Yabura 71:1-14

¹Alatala, n kantama na i tan nan na, i naxa tin n xa lu yaagi kui.

²I xa n nakisi, i xa n mali i xa tinxinyi kui. I tuli mati n na, i n nakisi.

³I xa n kanta. I bara a fala n bɛ n xa lu i xa niini bun ma tɛmui birin, alako n xa kisi. N kantama na i tan nan na.

⁴N Marigi Ala, n natanga mixi ɲaaxie sɛnbɛ ma, n natanga xɔnnante tinxintaree ma.

⁵N Marigi Alatala, n xaxili tixi i tan nan na kabi n dimɛdi tɛmui,

⁶kabi n nu na n nga tɛɛgɛ i. I tan nan a niya n xa bari. N i matɔxɔma tɛmui birin.

⁷N findixi misaali nan na mixi wuyaxi bɛ, barima n kantama sɛnbɛma na i tan nan na.

⁸N i matɔxɔma tɛmui birin.

⁹I naxa mɛɛ n na n ma foriɲa kui, i naxa n nabɛɲin n ma sɛnbɛtareya kui.

¹⁰N yaxuie n mafalama, e wɔyɛnma e bora ra alako e xa n faxa.

¹¹E naxɛ, «Ala bara a rabolo, won xa bira a fɔxɔ ra, won xa a suxu. Mixi yo mu nɔma a ratangade.»

¹²Ala, i naxa i makuya n na. N Marigi Ala, fa n mali mafuren.

¹³Ala xa e rayaagi, a xa e raɲɔn, naxee n tɔɔɲɛgɛma. Ala xa e rayaagi, a xa e ya ifu, naxee wama n tɔɔrɔfe.

¹⁴N xaxili tixi i ra kudɛ i. N luma i matɔxɔ ra tɛmui birin.