Prabebs 7:4-14

⁴Yu garra laigim det sabibalawei brabliwei jis laik im yu ronwan sista, en det streitbala main jis laik yu ronwan fren.

⁵Dei garra album yu blanga kipawei brom detlot gel hu nomo jidan trubalawei garram olabat hasbin en hu oldei tok garram ola switwan wed blanga meigim eni men gudbinji.”

⁶Wal det sabibala bin kipgon tok, “Wandei aibin lukinatbat atsaid thru langa main windo brom main haus,

⁷en aibin luk bigismob yangboi hu nomo sabi matj, en aibin luk wanbala deya hu nomo bin sabi eni klebabalawei.

⁸Imbin wokwokbat langa det kona langa det roud weya bin go gulijap langa det haus blanga wanbala gel.

⁹Imbin go gulijap langa det haus wen imbin naitaim na.

¹⁰“Wal det wanbala gel bin kaman langa det men na. Imbin dresap wulijim gel hu oldei silipsilipbat garram eni men blanga mani en imbin meigimbat plen blanga trikim im.

¹¹Det gel bin brabli nogudbala gel en im nomo bin abum eni sheim. Imbin oldei wokwokbat langa detlot roud.

¹²Det gel bin oldei weidabat blanga eni yangmen langa eni roud o langa makit pleis.

¹³“Wal det gel bin grebum det yangmen en kis langa im, en im nomo bin sheim, najing. Imbin luk im streit langa im ai en imbin tok,

¹⁴‘Ai garram det bifpat brom det sekrifais ofring langa main kemp,