Prabebs 24:2-28

²dumaji olabat oldei jinggabat blanga faitfait en dum ola krulbala ting.

³Yu garra abum streitbala main en sabi hau blanga bildimap gudwan femili.

⁴Yu garra sabi brabliwei blanga bilimap yu haus garram ola gudwan ting weya mani kaan baiyim.

⁵Wen yu jidan sabibala yu gin bidim det strongbala men.

⁶Yu garra jinggabat brabliwei en meigim ola gudwan plen bifo yu go langa wo. If yu garram gudwan plen yu garra win.

⁷Det silibala men nomo garram det streitbala main, en wanim im tok, tharran na nomo album enibodi.

⁸Detlot pipul hu oldei meigimbat trabul, olabat na laigimbat trabul.

⁹Pipul nomo laigim detlot silibala pipul hu oldei jinggabat blanga dumbat nogudbala ting.

¹⁰If yu gibap en jidan wikwan wen trabul kaman, wal yu brabli wikwan na.

¹¹Yu garra album enibodi hu dei garra kilim wen dei nomo bin gibit im feyago.

¹²Yu kaan tok, “Ai nomo sabi enijing blanga dijan.” God sabi wanim yu jinggabat langa yu main. Im oldei wotjimbat wi en im sabi wanim wi jinggabat en im garra peiyimbek wi blanga wanim wibin dumbat.

¹³Main biginini olabat, det shugabeig im gudwan blanga yumob en im teist brabli gudwan.

¹⁴Wal lagijat seimwei du, if yumob garram det sabibala main im meigim yumob brabli gudbinji. If yumob garram det sabibala main yumob garra jidan gudbalawei longtaim en wanim yumob bin wandim blanga hepin garra kaman trubala.

¹⁵Yumob nomo jidan wulijim det wikitwan men en gibitbat adtaim langa gudbala pipul en ardimbat olabat femili olabat.

¹⁶Wen detlot gudbala pipul abumbat loda trabul olataim olabat nomo gibap, bat wen detlot wikitwan pipul abum bigiswan trabul olabat garra binijap.

¹⁷Yumob nomo gudbinji wen yumob enami abum trabul en buldan.

¹⁸YAWEI det trubala God garra sabi en im garra jidan nogudbinji langa yumob en im kaan wail langa detlot enami olabat enimo.

¹⁹Yumob nomo larram detlot nogudbala pipul meigim yumob wori o meigim yumob jelas langa olabat,

²⁰dumaji dei garra binijap jis laik det lait langa lemp im binij.

²¹Main biginini olabat, yumob garra abum rispek blanga YAWEI en det king brabliwei, en yumob kaan meigim fren garram detlot pipul hu gibit bekboun langa YAWEI en det king.

²²Wal nobodi sabi wotaim YAWEI en det king garra panishim detkain pipul kwikbalawei wen dei gibit dubala bekboun.

²³Wal dislot iya mowa brabli gudwan wed blanga ola sabibala. Wen yu jidan det jadj langa kothaus yu garra gibit pipul feyago.

²⁴If yu larram giltiwan pipul go fri, wal ebribodi langa dijan kantri en ola najalot kantri garra tok nogudwei blanga yu.

²⁵Bat if yu panishim detlot giltiwan pipul ebrijing garra wek gudwei blanga yu, en yu garra abum loda gudbala ting.

²⁶Enibodi hu tok streidat langa im fren, shoum im fren im rili laigim im.

²⁷Yu garra meiksho yu meigim pedik redibala en growimap sid daga basdam bifo yu bildimapbat yu haus.

²⁸Yu nomo tok sambodi im gilti wen im nomo gilti.