Olcueih 24:2-28

²Amih kah lungbuei loh rhoelrhanah te a taeng tih, a hmuilai loh thakthaenah ni a thui.

³Cueihnah neh im a sak tih a lungcuei neh a thoh.

⁴Mingnah loh boeirhaeng neh a kuel a ka, a naep a noi boeih khaw imkhui ah a khawk sak.

⁵Cueih he tah hlang kah sarhi la om tih, mingnah loh hlang kah thadueng a cong pah.

⁶Caemtloek vaengah nang hamla a niing hang hol vetih, uentonah cungkuem neh loeihnah hang khueh ni.

⁷Cueihnah he aka ang ham tah sang aih. Vongka ah a ka a ong pah moenih.

⁸Thaehuet ham aka moeh tah, “Tangkhuepnah boei,” la a khue uh ni.

⁹Anglat kah a tholh khaw khonuen rhamtat, hmuiyoi hlang khaw tueilaehkoi ni.

¹⁰Citcai tue vaengah na tahah tih, na thadueng khaw tla.

¹¹Duek sak ham a khuen uh te huul uh laeh, ngawnnah la aka yalh te khaw hloh uh laeh.

¹²“Ka ming uh moenih ko he,” na ti cakhaw, amah loh lungbuei a khiinglang tih yakming mahpawt a? Na hinglu aka kueinah loh a ming ta. Te dongah hlang he amah kah bisai bangla a thuung ni ta.

¹³Ka ca, khoitui tah then tih ca lah. Khoilitui tah na ka dongah didip ta.

¹⁴Cueihnah te na hinglu ham ming van lah. Na hmuh atah na hmailong khui vetih, na ngaiuepnah khaw yoe mahpawh.

¹⁵Halang aw, hlang dueng tolkhoeng ke rhongngol thil boeh, a kolhmuen te khaw rhoelrhak pah boeh.

¹⁶Aka dueng tah voei rhih a cungku akhaw koep thoo dae, halang rhoek tah yoethae nen ni a tongtah uh.

¹⁷Na thunkha, na thunkha te a cungku vaengah kokhahnah boeh, a paloe vaengah khaw na lungbuei omngaih sak boeh.

¹⁸BOEIPA loh a hmuh vaengah a mik lolh vetih, anih taengkah a thintoek te vik lat ve.

¹⁹Thaehuet dongah sai boeh. Halang rhoek taengah khaw thatlai boeh.

²⁰Boethae ham a hmailong a khui pah moenih, halang kah hmaithoi khaw a thih pah ni.

²¹Ka ca, BOEIPA khaw, manghai khaw rhih lah. Aka thovael neh pitpom boeh.

²²Amih te rhainah loh buengrhuet a pai thil vetih, amih rhoi kah yoethaenah te ulong a ming?

²³He rhoek khaw hlang cueih kah a hut ni. Laitloeknah dongah maelhmai loha sak khaw then pawh.

²⁴Halang te, “Na dueng,” aka ti nah tah, amah te pilnam loh a tap vetih, namtu loh kosi a sah thil ni.

²⁵Tedae amih aka tluung rhoek te hoel ti vetih, a soah yoethennah hnothen loh a thoeng pah ni.

²⁶Langya la olka aka mael tah, a hmuilai te a mok pah.

²⁷Na bibi te vongvoel ah khaw cikngae sak. Anih te a hnukah na lo ah a sikim phoeiah na im te thoh.

²⁸Na hui te hong mai neh laipai la om thil boeh. Namah kah hmuilai neh na hloih a?