Petruj II 1:1-14

¹IET nai Jimon Petruj ladu o wanporon en Iejuj Krijtuj on irail, me paikier pojon kajampwal ota dueta kit, me kitail aleer ki pun en atail Kot o Jaunkamaur Iejuj Krijtuj.

²Mak o popol en roklan komail ki erpit en Kot o Iejuj atail Kaun.

³Jon en manaman en Kot karoj, me itar on maur o lelapok, kijakij don kitail er, ki kupurkon en i, me kotin molipe kitail ki pein a linan o manaman.

⁴Ni mepukat a kotin kijakij ki don kitail inau lapalapia o kajampwalia kan, pwen kare on komail maur en Kot, o tan wei janer me jued akan, me mi jappa ki inon jued.

⁵Komail ari nantion eta, kida jar mau ni omail pojon, o ni jar mau lolekon.

⁶O ni lolekon koton, o ni koton kanonama, o ni kanonama lelapok.

⁷O ni lelapok limpok on jaulan kan, o ni limpok on jaulan kan limpok on amen amen.

⁸Pwe ma mepukat mi re omail, o pwaida re omail, komail ap jota pan tanana de jo wa ni lolekonki atail Kaun Iejuj Krijtuj.

⁹A me jota pwaijaneki mepukat, nan i majkun, o a kin dedam jili waja, aki a monokela a wideud jan ni dip a dip en maj.

¹⁰Ri ai ko, i me komail nantion katenedi omail paeker o pilipil, pwe ma komail pan wiada mepukat, komail jota pan pupedi.

¹¹Pwe i me komail pan pedelonki peren nan wei joutuk en atail Kaun o Jaunkamaur Iejuj Krijtuj.

¹²I me i pan kataman kin komail anjau karoj, menda ma komail aja mepukat, o komail keleki melel.

¹³I lamelame, a pun, i en kataman kin komail o kamana komail da, arain ai pan mimieta nan im pwal wet.

¹⁴Pwe i aja, eten i pan pwilikidi war ai duen atail Kaun Iejuj Krijtuj kotin majani on ia er.