2 Pitö 1:1-14

¹Saimon Pitö nöŋön embuk keu eraum mötpingöra kimbi ki ohozal. Jisös Kraistnöŋ melaim niŋgiiga aposol aka welenŋi qeba malakzal. Bem Anutuninan Amötqeqe Toŋi Jisös Kraist melaiiga eri yaŋgöra aka keunini jim teköi solaniinga mötnaripninan ahuyök. Iŋini mötnarip miyök buŋa qem aŋgugetka bohonŋi öŋgöŋgöŋi aiga nini ewö simbawoŋ malje.

²Iŋini Anutu aka Kembunini Jisös möt kutum etkizei, yetkön mönö kalem möriamŋi keleŋmaleleŋ eŋgiyohotka luainöŋ malme. Mewö.

³Anutunöŋ asakmararaŋ Toŋi aködamunŋambuk akza. Miaŋgö dop nini sarakŋi aka malbingöra neŋgoholök. Mewö könaŋi möt yaköinga kalem neŋgimakzawaŋgö könaŋi asuhuyök. Nini malmal köhöikŋi mala urugö köl guliguli pitirik akingöra yuai osimakini, yaŋgö bem ösumŋan mönö mi pakpak neŋgiiga buŋanina ahakŋa.

⁴Asakmararaŋ Toŋi yaŋön urunine nupŋi nupŋi wewelip-ŋambuk memba kalemŋi pakpak neŋgimamgö mörakza. Anutunöŋ jöhöjöhö keuŋi neŋgiyöhi, miaŋgö söŋgöröŋan mönö öŋgöŋgöŋi akza. Iŋini mutuk gölmegö sihim kömbönaŋini bölöŋi laŋ wuataŋgöba aŋgöjörak uruŋe malgetmö, Anutunöŋ iŋini miaŋgö-reŋök meköba bohonŋini jöhöyök. Mewö aiga kopa malmal söröreiba andö qemegöra amötqeqe areŋi ali ahöza. Mötmöt ahakmeme aködamunŋambuk Anutugöreŋ ahözawi, yaŋön iŋini miaŋgö dop letota kölöŋaimegöra kapaŋ kölakza. Iŋini jöhöjöhö keuŋi keta bölökŋi miaŋgöreŋ qekötahöze ewö, yaŋön mönö inahöm eŋgiiga kunbuk letota Suepkö aködamunŋi miwikŋaiba buŋa qem aŋguba malme. Aködamunŋi miaŋön ölöp tönjonjoŋgöba dop köl eŋgima.

⁵Anutugöreŋ jöhöjöhö keu mewö ahözawaŋgöra aka iŋini mönö mötnaripkö ölŋi ahum eŋgiiga kondela malme. Mewö malmegöra mönö kapaŋ köla zeŋ kinda bim qeba malme. Ölŋi ahum eŋgimawi, mewö ölöp Anutugö könaŋi toroqeba möt kutume.

⁶Mötkutukutuŋinan qariiga ölöp ahakmemeŋini toroqeba galöm köl aŋgumakŋe. Galöm köl aŋguaŋguŋinan qariiga ölöp kin köhöiba lömböt mökösöŋda bisiba malme. Kin köhököhöiŋinan qariiga ölöp kunbuk Anutugö jitŋaŋgö dop urugö köl guliguli aka malme.

⁷Urugö köl guliguliŋinan ahum qariiga ölöp urukalemŋinan sehiiga urumeleŋ alaurup ala-ala aka köyan köl aŋguba malme. Urukalemŋinan sehiiga ölöp ambazip pakpak jöpaköm eŋgiba malme.

⁸Iŋini Anutugö aködamun mewöŋi buŋa qem aŋguba mem sehiba malme ewö, mönö gilipitŋi (ambetakŋi) kude malme. Mewö qahöpmö, aködamunŋi miaŋön mönö nam köl eŋgiiga amqeba Kembunini Jisös Kraistkö könaŋi möt kutuba ölöp nupŋi jegep kinda megetka ölŋi ahumakŋa.

⁹Ölöp ahumakŋapmö, denike yeŋgöreŋ Anutugö aködamun mewöŋi qahö ahöm eŋgiza ewö, yeŋgö mötkutukutuŋinan mönö töröpŋi aiga bau jegömöl ewö kiŋkuŋ kaŋkuŋ akze. Anutunöŋ siŋgisöndokŋini walŋi saŋgoŋni sarakŋi akeri, mi ölum eŋgui ikmaok malje.

¹⁰O urumeleŋ alaurupni, Anutunöŋ möwölöhöm eŋgiba eŋgoholöhi, iŋini miaŋgöreŋ tim töndangöba kinme ewö, mönö nalö kunöŋ qahö tala kaman kölme. Miaŋgöra eŋön mönö miaŋgöreŋ köhöikŋanök töndangöba kinbingö kapaŋ köla malme.

¹¹Mewö aka malgetka Anutunöŋ eŋgehi dop köli köl öröm eŋgiiga Suep miri naŋguŋan lökŋanök taliga ölöpŋanök uruŋe öŋgöme. Kembunini Jisös Kraistnöŋ Amötqeqe aka bemtohoŋ Toŋi akza. Yaŋgö bemtohoŋ uruŋe öŋgögetka nalö teteköŋi qahö galöm köl eŋgiiga oyaeŋkoyaeŋ aka malme.

¹²Buŋa keu ölŋan köna mewö kondel eŋgizawi, iŋini mi lök buŋa qem aŋguba miaŋgöreŋ böŋ qeba kin köhöize. Miaŋgöra keu areŋ jizali, mi ölöp möt asarizemö, nöŋön töndup miaŋgöra nalö dop jim gulim eŋgimamgö mötzal.

¹³Mewö möta sile kiaŋgö sepö koumnöŋ malmamaŋgö dop keu areŋ mi ölum eŋgubapuköra mötmötŋini jim guliba kuŋgum eŋgimamgö mötpi dop kölja.

¹⁴Nöŋön sileni kusukŋi ki sepö koumni ewö luluŋda zilaŋ kömumba uŋem mire öŋgömami, mewö möt yaközal. Kembunini Jisös Kraistnöŋ mewöyök buzup keu mewöŋanök jii möral.