2 Pita 1:1-14

¹Na Saimon Pitaya. Na Bro Nkifrarhu hingrneft hingrnewa yimaya. Nann Jisas Kraisr aposer hingrneft fak htamor. Nann ndar gontwat niko Jisas Kraisr hikwa yima-kmoh yufampno htefiwant. Jisas Kraisr nmoh Bro Nkifrar tohwor. Tohhato nrfa htiyakmornom. Nikomi nom Aposernom nmoh rhu nmbuhat Bro Nkifrar htitwort rpahtet ruheft korhnom. Nom Jisasr hikwa yihotat, ndtn kukatohwor. Nhai nom yakitohwa yufamn o maru kunymn o tamoh tamohmn htikahr. Nhai. Nom Jisasr hikwa yuhatn htitr. Nikomi nom Aposernom Jisasr hikwa yuhat hifa rpat niyak tkaf hanitf. Nhai nom Aposernom mfrfnahnihato niko yiho tohkahko. Nhai.

²Nmoh Bro Nkifrari Jisasr, nom yak hta bohtiwar, hifa rofpno bi tohwoko. Bro Nkifrarpno kfo bruttna kanga nikmoh rhu nmbuham ayak marnyakahtrm rhu marnya-ruhakomn yima yuhum be mirhurahm.

³Jisas Kraisr Bro Nkifrayer. Ror tu bro nanyjar bbukeft hatohwor. Rorhu nd nanyjar bbukeft kfiwut nom Bro Nkifrarhu nefm hikwonom yo dborioh rhu nmbuhat korhwonom. Nd dborioh rhu nmbuhat nom yorhwat be inji rhu nkifraniraht. Nom Kraisrpno nia tohwohat dborioh rhu nmbuhat kahukrnom. Nmoh yukatoh nmbuhat htimonomr Bro Nkifrar kanjo yo bro bbuka nanyjaret yimar kanjo, ndnatn rorhu naku tngr yimohat nom wany-hato nia twanhomonom.

⁴Jisasr Bro Nkifrayer. Ndnatn nom rorpno rim tohmohat Bro Nkifrarhu dukefr hikwonom. Nmoh rhu toh nmbuham, tur kfo htamo yuhamn hifa hifa fak htamorm. Inji yak hta marnyamotrm, niko ariham Bro Nkifrarhu dukefrn kau hikwoko. Yau hikhato ndar bbinysofthu fasoh yima yuhur mong trohwokomr. Ndnettn nhai nd fasoh yima yuhurn yak hatohaforuhatrko fasoh tkit bebt yiruhatko.

⁵Nd bro dukefmpno nikmoh tpim habokkna marnyahato Jisasr yakitoh-kfot. Jisasr yakitohhato dborioh nefm rpat yakitohkfot. Dborioh nefm yakitohhato dborioh dukefm yakhato dborioh dukefmpno yaukfot.

⁶Dborioh dukefmpno yauhato yima yuhum tamohm dukefm sinyewum afo yak nhtakfot. Yima yuhum yak nhtahato toh bmtakfot. Toh bmtahato Bro Nkifrarparhu dukefr hikkfot.

⁷Bro Nkifrarhu dukefr hikhato tuko Jisasr hikwako nayak marnyahato tuko nayakitohkfot. Tuko Jisasr hiketko nayak marnyiwa kanjo wom yima furam inji yak marnyakfot.

⁸Inji tohhany tohhanyrahko to be nd nefrpam bronirahmko. Bronihato nmoh Nungothet Jisas Kraisrhu hik yuham nhai myak mmotaruhatko. Hik marnyaknirahkomr.

⁹Wom yimar nhai nd kfiwa nefm yakitohkahrm, nd yimar nyingam kunyjwatmr nhai hti hikkahrm Bro Nkifrar hti yindhorwa nefm. Hti mmohato nhai mhtiyakkahrt Bro Nkifrar rorhu fasoh nefm yak thuhemo yuhat.

¹⁰Niko nanhu yimatko kfiwanko, mirahko ndhtet yimaroh fasoh dukefm ahiknom. Nd dborioh dukefm bi kfahukam niko ndmn hik-kfot. Niko Bro Nkifrar yakmohat memor, “Nanhu yon kunys rhurahm.” Ndnettn nd nefmn yakitoh trpaknikfot. Yakitoh trpaknirahko be nhai suhhato mong trohruhatkomr.

¹¹Inji nahato nom nrfa htiyakmo bro yima Jisas Kraisr hti yindhorruharnom yakmi-yakrahrnom ror king tohruha kmi hefenr.

¹²Jisas Kraisrhu mrokfot rot hifa wany yindhorhato bi myakitoh bmtak-nitkomt. To na kanga tfit wompam wompam akfo duka hanykahtanko yima yuhum duka hanyrahmm na kfoyuk mrokfom.

¹³Hifa mkfo dukak hanitanko. Kfo duka hanyetkomn mrokfom bi wany hmbrita hanyhato rhurahko. Kto na nohnineft mrokfom nhai yafho thuruhatkomm.

¹⁴Na tuka kak nhtewa nanhu nohhato ndar thatipthu thu hur sany yihar bi brboh-wor. Nmoh Nungothet Jisas Kraisr bi inji kfo nuhasmora.