2 Pita 1:1-14

¹Namba Saimone Pita Jisasa Kataisanya kendemane-kisa aposele dokome masoo miningi epe naimame minilyamanoli pyoo miningi nyakamanya pepa dake pyao peekelyo. Naimanya Gote-kisa Pyoo Nyingi Jisasa Kataisame mana tolatae miniamo dokonya-kaita masoo miningi doko nyingi.

²Nyakamame Gotepa naimanya Kamongo Jisasapa lao masokondape pilyamino dokome Gotepa Jisasapame nyakama kandao mona epe mende palyalakao palyetala nyakamanya mona doko etete lyuu lasekena.

³Naima lete kalyanyapi Gote watao minalanyapi dolapo nyepenge dupa pitaka Goteme baanya pupu lapae dokome naima dia. Baame baa tangenya tii pipaepa pupu lapaepa dolapome naima ipupa leana lao masokondape pilyamano dokonya-kaita dopa pia.

⁴Wamba baame tii pipaepa pupu lapaepa dolaponya-kaita etete angipa etete andakepa dolapo naima ditona leamo dolapo ditia. Dito leamo doko dapa pyoo kini jilyamo: indupa nyakama Gote yale joo katapala, yuunya nyipu laka lao masingi dokonya-kaita endakali koyasala epenge dupa nyakamame wandinya nepao kalyamino.

⁵Tenge dutupanyaka minao nyakama mona mendai paliuu Gote lao masoo minilyamino dokome mana epe dupa awapa kyoto joo watao minalapape. Dee mana epe dupa auu pyoo minatamino dokome masepae joo kalyepape.

⁶Masepae joo katatamino dokome tange auu pyoo isoo kalyepape. Tange auu pyoo isoo katatamino dokome kyoto joo kalyepape. Kyoto joo katatamino dokome Gote watao minao kalyepape.

⁷Gote watao minao katatamino dokome mende auu kaya kaya pyoo kalyepape. Mende auu kaya kaya pyoo katatamino dokome mona setawaka kalyepape.

⁸Doko, mana dutupa minatala, minama-minama pyoo epao minatamino kandao doko, nyakama mee ambe nakatao wambu pyoo naimanya Kamongo Jisasa Kataisa doko lao masalakao masoo katatami.

⁹Dopaka doko, mana dutupa naminingi endakali dokome opale mende tependale silya doko nakandao lenge monda joo katenge. Baame wamba koo piamo dupa Goteme kunao nepakamaiyamo doko kame singi.

¹⁰Dopana, kaimia paluma, Goteme nyakama ipupa latala yapao nyiamo dokonya kyoto joo epao katawani kayao kalyepape. Dopa pitamino kandao doko, nyakama kapa pao alu napitami.

¹¹Nyakamame mana dutupa watao minataminopa naimanya Kamongo-kisa Pyoo Nyingi Akali Jisasa Kataisanya isingi panda etete katapenge dokonya kaitini doko pee lao nyakamanya lumbakata.

¹²Dopana, nyakamame dopale dupa masoo kiningi pii doko kyoto joo minilyaminoaka doko, dutupanya nambame koteaka lao deaka nyakamanya masingi sakatasakatoo lao masilyo.

¹³Namba yuu dakenya lenge tao mee kalyo gii dakepa nyakamanya masingi sakatasakato kandao doko, kapana lao masilyo.

¹⁴Naimanya Kamongo Jisasa Kataisame namba-kisa pitamina lao panasiamoli pyoo gii kuki patatamopa namba alu pipengena lao masilyo.