Osea 14

1

2

3

4

5

6

7

8

9

10

11

12

13

14

¹Ämi chon Israel, oupwe liwiniti ewe Samol mi Lapalap ämi we Kot. Oua chepetek o turula pokiten ämi kewe tipis.

²Oupwe liwiniti ewe Samol mi Lapalap o eäni ei iotek ngeni, “Kopwe amusala äm kewe tipis meinisin o etiwakem fän om ümöümöch, pwe aipwe mwareituk usun äm aia fen pwon.

³Asiria esap tongeni amanauakem, ekewe orisin maun resap tongeni alisikem. Aisap chüen apasa ngeni äm kewe uluulun anümwäl pwe ir äm Kot. Ekewe mi mäsen ra küna ümöümöch me reöm.”

⁴Iwe, ewe Samol mi Lapalap a üra, “Üpwe aliwinato nei aramas o tongeer seni unusen letipei, pun üsap chüen song ngeniir.

⁵Üpwe usun chök amurenipwin ngeni chon Israel. Repwe sonula usun pön kiop, repwe fokun warar usun ekewe irän Lepanon.

⁶Fasarer repwe mämäritä, repwe ling usun ekewe irä olif, repwe pwoöch usun ekewe setaren Lepanon.

⁷Repwe liwinsefäl o nom fän ai tümwün. Repwe mämäritä usun wiich o ua usun ekewe irän wain. Repwe iteföüla usun ewe wainin Lepanon.

⁸Ekewe chon Israel resap chüen fel ngeni ekewe uluulun anümwäl. Ngang ewe mi pälüeni ar iotek o tümwünüür. Ngang üa wewe ngeni ewe irä saipires mi arauarau fochofoch, ar feiöch a feito seniei.”

⁹Iö mi tipachem epwe weweiti mine a mak ikei, iö mi mirit epwe ekieki usun lon lelukan. Pun än ewe Samol mi Lapalap kewe al ra wenechar, ekewe chon pwüng ra fetal wor, nge ekewe chon tipis ra chepetek wor o turula.