3Imbin kipum im pramis langa ola Isreil pipul. Imbin rispek en abum det filing blanga laigim im pipul olabat olataim. Pipul brom ebriweya bin luk God bin win garram im pawa.
4Sing hepiwei ola pipul, langa YAWEI. Preisim im garram ola song en jingat gudbinjiwei.
5Sing preis song langa YAWEI. Plei myusik garram ola gita.
6Blowim ola longwan wisul en hon en jingat gudbinjiwei langa YAWEI det bos blanga wi.
7Solwoda, en ola enimul weya jidan insaid langa solwoda jingat gudbinjiwei. Kantri en ebrijing weya jidan langa kantri, sing du.
8Ola riba klep bingga, en ola hil sing mijamet blanga preisim YAWEI.
9Ebrijing preisim YAWEI det trubala God, dumaji im kaman blanga jadjim ola pipul langa dijan wel. Im garra jadjim pipul raitwei en gibitbat ebribodi feyago.