Ola Saam 97:1-12

¹YAWEI det trubala God im Brabli Boswan! Ola pipul langa ebri kantri yumob gudbinji. Jidan gudbinji ola pipul langa ola longweiwan kantri.

²Ola klaud en det dakbala jidan raidaran langa YAWEI. Im jidan bos en dumbat ebrijing raitwei, en im gibitbat ebribodi feyago.

³Det faiya go lida langa im en barnimap ol im enami olabat.

⁴Ola laitining blanga im shainimap dijan wel, en wen ola pipul luk tharran, im meigim olabat sheik nomo lilbit.

⁵Ola hil meltap lida langa YAWEI. Im det boswan blanga ebrijing langa dijan graun tudei.

⁶Ebrijing langa skai shoum det raitwei blanga im. En ebribodi langa ebri kantri luk im pawa en im shainiwan lait.

⁷Ebribodi hu weshipbat ola drimin sheip, en hu jidan praudbala blanga olabat drimin, garra sheim miselp. Ola drimin nildan en weship YAWEI.

⁸Detlot pipul brom Jerusalem en ola taun langa Juda jidan gudbinji, dumaji yu na, YAWEI det trubala God jadjim pipul raitwei.

⁹YAWEI, yu na det Boswan God en yu jidan boswan blanga dijan wel. Yu jidan mowa haibala langa ola drimin.

¹⁰YAWEI laigim ol detlot pipul hu nomo laigim dumbat brabli nogudbala ting, en hu nomo laigim wen najalot pipul dumbat nogudbala ting du. Im lukaftum im pipul olabat. Im seibum olabat brom det pawa blanga ola brabli nogudbala pipul.

¹¹God im oldei deya langa det lait seimwei laik im oldei gibit gudbala ting langa detlot pipul hu oldei dumbat ola rait ting, En im meigim ola gudbala pipul jidan gudbinjiwei.

¹²Ol yumob pipul hu jidan raitwei, yumob garra gudbinji blanga wanim YAWEI bin dum. Jinggabat wanim det brabli holiwan God bin dum en gibit im theingks.