Ola Saam 94:4-20

⁴Haulong detlot pipul hu dumbat nogudbala ting garra kipgon laigimbat miselp en jidanbat praudbalawei wen dei dumbat detlot nogudbala ting?

⁵Dei jidan jigiwan bos en meigim yu pipul olabat adwek brabliwei, YAWEI. Dei ardimbat yu pipul olabat.

⁶Dei kilim ded ola widogel en detlot biginini hu nomo garram mami en dedi. En dei medrim pipul hubin kaman brom najawan kantri blanga jidan langa wi kantri.

⁷En dei tok, “YAWEI nomo luk wi. Det God blanga Isreil nomo sabi wanim wi dumbat.”

⁸Main pipul olabat, yumob brabli siliwan pipul. Wotaim yumob garra len?

⁹God bin meigim wi irriwol, bat yumob reken God kaan irrim yumob! Imbin meigim wi ai, bat yumob reken im kaan luk langa yumob!

¹⁰Im graulim ola pipul langa najalot kantri, bat yumob reken im kaan panishim ola wikitwan bos blanga wi! Im na titja blanga wi holot, bat yumob reken im nomo sabi enijing!

¹¹YAWEI sabi wanim detlot pipul jinggabat, en im sabi detlot ting nomo garram eni pawa.

¹²YAWEI, ol detlot pipul hu irrim yu en weya yubin titjimbat olabat ol yu lowa garra jidan gudbinjiwei.

¹³Yu larram ol detlot hu irrim yu abum spel brom ola trabul raidap det taim weya yu redi blanga binijimap detlot nogudbala pipul.

¹⁴YAWEI kaan neba gibit bekboun langa im pipul olabat. Im kaan neba libum ol im pipul olabat.

¹⁵Langa ola kothaus ebribodi garra abum feyago igin, en ola pipul hu dumbat ola rait ting garra bekimap tharran.

¹⁶Hubin jandap blanga mi langa ola nogudbala pipul? Hubin bekimap mi brom ola brabli wikitwan pipul?

¹⁷If YAWEI nomo bin album mi, ai bina godan langa det pleis weya ola dedbala pipul oldei go.

¹⁸Aibin tok, “Mi buldan”, bat det filing blanga yu weya yu laigimbat pipul olataim bin lidimap mi.

¹⁹Wen mi hatjamp en wori, yu lidimap mi en meigim mi gudbinji.

²⁰Yu nomo laigim ola nogudbala jadj hu oldei gibit adtaim langa pipul. Dei nomo jadjim pipul raitwei garram ol yu lowa.