Ola Saam 91:5-16

⁵Yu kaan bradin blanga olkain nogud ting weya hepin naitaim. If sambodi wandi ardim yu deitaim wal yu kaan bradin.

⁶If yu brabli sik midulnait, o if yu gulijap gitkil dinataim, yu kaan bradin.

⁷Nomeda loda pipul wansaid langa yu mait dai, en bigmob pipul mait binij raidaran langa yu, bat nomo enijing kaan ardim yu.

⁸Yu garra oni luk det trabul, en yu garra wotjim God panishim brabliwei detlot nogudbala pipul.

⁹If yu go langa YAWEI blanga jidan seif, en if yu jidan garram det Brabli Haibalawan,

¹⁰wal nobodi kaan ardim yu. Nomo eni nogud ting kaan kaman langa yu kemp,

¹¹dumaji im garra jandim im einjul olabat langa yu, en im garra dalim olabat blanga wotjimbat yu ebriweya yu go.

¹²Detlot einjul garra lidimap yu ontop garram olabat bingga wulijim yu kaan ardim miselp. Yu kaan ardim lilbit langa yu fut o eniweya langa yu bodi.

¹³Nomeda yu pudumbut yangwan laiyan o jigiwan sneik, detlot einjul na garra seibum yu brom ol detlot jigiwan ting.

¹⁴YAWEI tok, “Detlot pipul hu laigim mi, ai garra seibum olabat. Ai garra wotjim detlot hu sabi mi.

¹⁵Wen dei jingat langa mi, ai garra ensim olabat. Ai garra jidan garram olabat wen dei abum trabul. Ai garra seibum olabat, en ai garra lidimap olabat haibala.

¹⁶Ai garra meigim olabat jidan laibala longtaim. Dei garra luk hau mi seibum main pipul.”