Ola Saam 89:21-45

²¹Ai garra oldei album im, en main pawa garra oldei meigim im strongbala.

²²Im enami olabat kaan neba win en jidan bos langa im. Ola brabli nogudwan pipul kaan bidim im.

²³Ai garra binijimap im enami olabat, en kilim ded ol detlot hu nomo laigim im.

²⁴Ai garra laigim im en jidan trubala langa im. En mowa igin, ai garra oldei meigim im win.

²⁵Ai garra meigim im kantri bigwan, brom det Medatareiniyan solwoda raidap langa det Yufreitis Riba.

²⁶Deibid garra tok langa mi, ‘Yu main dedi en main God. Yu na oldei maindimbat en seibumbat mi jis laiga bigwan ston.’

²⁷Ai garra meigim im main feswan san, en det brabli nambawan king brom ol detlot najalot king.

²⁸Ai garra oldei kipum main pramis langa im, en main strongwan pramis garra jidan olagijawan garram im.

²⁹Im femili neim garra jidan olagijawan wulijim det skai. Brom im femili lain, king garra oldei jidan.

³⁰“Bat if olabat nomo teiknodis en bulurrum ol detlot lowa blanga main,

³¹en if olabat nomo dum wanim ai dalim olabat,

³²wal ai garra panishim olabat blanga olabat nogudbalawei. Ai garra meigim olabat ardimbat blanga olabat nogudbalawei.

³³Bat ai kaan stap laigimbat Deibid, en ai garra kipum main pramis langa im olagijawan.

³⁴Ai kaan breigim main strongwan pramis langa im, o deigimbek eni pramis aibin meigim langa im.

³⁵“Trubala dijan na det pramis aibin meigim garram main ronwan seikridwan neim. Ai kaan dalim laiya langa Deibid.

³⁶Im femili lain garra kipgon olagijawan. En ai garra oldei maindimbat det kantri weya im jidan bos wulijim det san weya im oldei shain olataim.

³⁷Im garra jidan olagija jis laik det mun, weya im jidan trubalawan witnis blanga mi langa skai.”

³⁸Bat YAWEI, yubin gitwail langa det king weya yubin pikimat. Yubin libum im miselp en yu nomo wandi sabi im enimo.

³⁹Yubin breigim yu strongwan pramis garram yu wekinmen, en yubin tjakamdan im speshalwan het langa graun.

⁴⁰Yubin breigimap ola wol blanga im taun, en yubin libum ol im strongwan haus breikinwan.

⁴¹Enibodi hubin wokpas langa det pleis bin stilim ebrijing blanga im. En ola pipul langa ola gulijapwan kantri bin mokimbat im.

⁴²Yubin meigim im enami olabat bidimbat im, en yubin meigim olabat holot gudbinji nomo lilbit.

⁴³Yubin meigim nogud ola wepan blanga det king, en im nomo bin win wen imbin fait.

⁴⁴Yubin deigidawei im speshalwan stik weya im oldei holdim, en yubin nokamdan im speshalwan tjeya langa graun.

⁴⁵Yubin meigim im olmen na, bat im oni yangbala, en yubin meigim im jidan garram sheim.