Ola Saam 80:4-15

⁴YAWEI, Boswan God, haulong yu garra jidan wail en nomo ensim ola preya blanga yu pipul olabat?

⁵Yubin meigim melabat jidan brabli nogudbinjiwan. En yubin meigim melabat dringgim melabat ronwan tiyas.

⁶Yubin larram melabat enamimob fait blanga melabat kantri, En dei mokimbat melabat na.

⁷Brabli Boswan God, meigim melabat strongbala igin! Yu luk langa melabat garram yu shainiwan feis en seibum melabat.

⁸Yubin bringimat yu pipul olabat jis laiga greiptri brom det kantri Ijip. Yubin andimwei pipul brom najalot kantri en yubin plentim det tri langa olabat kantri.

⁹Yubin klinimap pleis blanga det greiptri blanga growap. Det rutpat bin godan raitdan en det greiptri bin spredimat miselp oloba langa det kantri.

¹⁰Imbin gaburrumap ola hil garram im bigwan sheid. Detlot wadi blanga det tri bin gro en gaburrumap detlot bigwan sidatri.

¹¹Detlot wadi blanga det tri bin kamat langa det Medatareiniyan solwoda en langa det Yufreitis Riba.

¹²God, wotfo yubin larram detlot enami blanga ola Isreil pipul breigimdan det wol weya bin jidan raidaran? Olabat garra stilim ola greip daga na wen dei gopas.

¹³Olabat jis laik detlot wailwan bigibigi weya rudimat det greiptri, en jis laik ola wailwan enimul dagadagatbat ola greip daga du.

¹⁴Brabli Boswan God, luk langa melabat! Yu lukdan langa melabat brom hebin. Kaman en seibum yu pipul.

¹⁵Yu kaman en seibum dijan greiptri weya yubin plentim, dijan na det yangwan greiptri weya yubin meigim gro brabli strongbala.