Ola Saam 78:12-22

¹²God bin dum ol detlot klebabala ting garram im pawa langa det plein kantri gulum Sowan, langa det kantri Ijip. En detlot femili blanga olabat bifo bin lukinat imbin dumbat.

¹³Imbin opinimap det solwoda en imbin deigim detlot pipul thru. Imbin meigim det solwoda jandap wulijim haiwan wol.

¹⁴Deitaim imbin oldei lidim olabat garram klaud, en naitaim faiya bin oldei barnbarn blanga lidim olabat.

¹⁵Imbin opinimap bigwan ston en imbin gibit olabat detmatj woda.

¹⁶Imbin meigim woda kamat brom det ston, en imbin meigim det woda randan wulijim riba.

¹⁷Bat deibin stil dumbat nogudbala ting langa God. Deya langa det deset kantri dei nomo bin wandi teiknodis langa det brabli haibala God.

¹⁸Deibin testimat God brabliwei wen deibin dalimbat im wanim deibin wandim blanga dagat.

¹⁹Deibin tokabat langa God en deibin tok, “Yu reken God gin gibit wi daga langa dijan deset kantri?

²⁰Trubala orait imbin hitim det ston en detmatj woda bin kamat, bat yu reken im gin gibit wi daga en gibit im pipulmob bif?”

²¹Blanga tharran na YAWEI bin brabli wail wen imbin irrim olabat toktok lagijat. Imbin fait langa im pipul olabat garram faiya. Imbin barn binji langa olabat brabliwei, jis laiga hotwan faiya,

²²dumaji dei nomo bin trastim im, en dei nomo bin bilib im na garra seibum olabat.