Ola Saam 77:4-14

⁴Ai kaan jadimap main ai dumaji yu na kipum mi weik. Mi brabli nogudbinji en ai kaan tok.

⁵Mi jinggabat blanga wanim bin hepin bifo, en mi jinggabat blanga ola oldendeis.

⁶Mi jinggabat ola song naitaim, en mi jinggabat en mi askim miselp.

⁷“Maitbi det Bos garra oldei nokambek wi? Maitbi im kaan gudbinji langa wi igin?

⁸Maitbi imbin stap laigimbat wi? Maitbi im garra stapam det pramis weya imbin meigim longtaim?

⁹Maitbi imbin kipumbek det kainbala filing blanga im dumaji im wail langa wi?”

¹⁰Afta na aibin tok miselp, “Dijan na meigim mi brabli nogudbinji. God bin abum detmatj pawa basdam, bat tudei na ai nomo luk im pawa.”

¹¹YAWEI, ai garra jinggabat blanga ola haibala ting yubin oldei dumbat. Ai garra jinggabat ol detlot ting yubin oldei dumbat garram yu strongbalawan pawa longtaim.

¹²Ai garra jinggabat ebrijing yubin oldei dum. Ai garra jinggabat olataim blanga ebrijing yubin oldei dumbat garram yu strongbalawan pawa.

¹³Det wei blanga yu main God im holiwan. Nomo eni drimin brabli haibalawan wulijim yu.

¹⁴Yu na det God hu oldei dum olkain ting garram yu pawa. Yu na shoum yu pawa langa ola pipul langa ebri kantri.