Ola Saam 74:7-23

⁷Deibin barnimap yu Serramoni Pleis garram faiya, en deibin dum brabli nogud ting deya weya melabat oldei kaman en weshipbat yu.

⁸Olabat bin wandi binijim melabat brabliwei, en deibin barnimap ola seikridwan pleis langa dijan kantri weya melabat bin weshipbat yu, God.

⁹Ola seikridwan ebrijing bin ol binijap, en ola speshalwan mesinja blanga God bin ol binijap du. En nobodi sabi haulong dijan trabul garra kipgon lagijat.

¹⁰God, haulong dislot enami blanga melabat garra laflafbat langa yu? Maitbi olabat garra kipgon toktokbat nogudwei blanga yu neim fogud. Wotaim dei garra stap toktok nogudbalawei?

¹¹Wotfo yu nomo album melabat? Wotfo yu haidim miselp bingga?

¹²Bat God, yubin jidan melabat king brom longtaim. Lodataim yubin oldei seibum yu pipul olabat iya langa melabat kantri.

¹³Garram yu strongbala pawa yubin kadimat det solwoda, en yubin breigimap detlot hedpat blanga detlot bigwan enimul weya jidan insaid langa solwoda.

¹⁴Yu na bin breigimap detlot hedpat blanga detlot bigwan krokadail gulum Labaiyathan, en yubin gibit im bodi langa detlot deset enimul blanga dagat.

¹⁵Yu na bin meigim ola springwoda en lilwan krik randan. En yu na bin draiyimap ola bigwan riba.

¹⁶Yu na bos blanga deitaim en naitaim, en yu na bin pudum det san en det mun langa dubala pleis.

¹⁷Yu na bin meigim ebrijing langa dijan wel blanga jidan langa olabat pleis, en yu na bin meigim hotwetha en kolwetha.

¹⁸Bat YAWEI, yu jinggabat. Detlot enami blanga yu bin mokimbat yu, en olabat nomo bin bilib en wandim yu.

¹⁹Nomo larram ola wailwan enimul gajim lilwan bard blanga yu. Nomo fogedabat yu ronwan pipulmob hu abumbat adtaim brom ola krulwan enami.

²⁰Yu jinggabat det strongwan pramis yubin meigim garram melabat, dumaji ola nogudbala ting jidan langa ebri kantri tudei.

²¹Yu nomo larram detlot pipul hu abumbat adtaim jidan garram sheim. Yu larram ol detlot powan pipul en ol detlot pipul hu nomo garram enijing preisimbat yu neim.

²²Yu gidap God, en jandap blanga yu wei. Yu jinggabat na blanga ol detlot pipul hu oldei mokimbat yu.

²³Yu nomo fogedabat yu enami olabat hu oldei jinginatbat. Dei oldei kipgon jinginat.