Ola Saam 51:9-19

⁹Jadimap yu ai, wulijim yu kaan luk ol detlot nogudbala ting main, en rabumat ol detlot ting aibin dumbat wen ai nomo bin duwit langa yu.

¹⁰Main God, meigim mi nyu insaid. Meigim mi jinggabat blanga ola gudwan ting.

¹¹Nomo jandimwei mi. Nomo deigidawei yu holi spirit brom mi.

¹²Meigim mi gudbinji laik aibin jidan basdam wen yubin seibum mi. En meigim mi wandi duwit langa yu.

¹³If yu dum lagijat, wal ai garra dalim ola brabli nogudbala pipul wanim yubin dum, en olabat garra tenim miselp en bulurrum yu.

¹⁴Main God, oni yu na gin seibum mi. Larramgo mi fri dumaji aibin medrim det men. If yu dum lagijat, ai garra jingat adbala en dalim pipul blanga ola gudbala ting yubin dum blanga mi.

¹⁵Main bos, album mi blanga tok strongbalawei, wulijim ai garra dalim najalot pipul yu brabli gudwan.

¹⁶Ai sabi yu nomo wandim mi jis blanga barnim ship blanga sekrifais ofring blanga yu. If ai oni barnim ship blanga ofring langa yu, tharran kaan meigim yu gudbinji.

¹⁷Main God, wen mi sori en meigim miselp lobala, det taim na yu kaan andimwei mi. Wen mi brabli sori en nomo jidan praudbala, tharran na det gudwan sekrifais blanga yu blanga jidan gudbinji garram mi igin.

¹⁸Jidan brabli kainbala langa yu pipul olabat langa Jerusalem, en album olabat bildimap det taun igin.

¹⁹If yu dum lagijat, wal ol yu pipul olabat garra jidan raitwei, en yu garra gudbinji wen dei gibit yu ola gudbala ting, en ship en buligi, en barnim olabat blanga weship langa yu.