Ola Saam 45:6-16

⁶Det kantri God bin gibit yu blanga jidan bos garra jidan olagijawan. Yu jidan bos langa yu pipul olabat en yu gibit olabat feyago.

⁷Yu laigim ola rait ting en yu nomo laigim ola nogud ting. Blanga tharran na det God blanga yu bin pikimat yu, en imbin meigim yu jidan gudbinjiwei olataim. Imbin gibit yu mowa brom ola najalot king.

⁸Det gudsmelwan medisin brom mera, elos en kasha jidan langa yu klos, en detlot hu plei myusik, plei blanga yu insaid langa ola bigwan haus weya deibin meigim purdiwan garram boun blanga elafen.

⁹Ola doda blanga ola king jidan deya garram ola najalot gel, en det gel weya yu garra merrit im jandap langa det raidensaid blanga yu speshalwan tjeya, en im werrimbat olkain ting weya deibin meigimbat garram brabli gudwan gol.

¹⁰Main gel, yu lisin langa wanim ai garra tok. Yu nomo teiknodis langa yu pipulmob en yu femilimob.

¹¹Yu brabli purdiwan, en tharran na garra meigim det king wandim yu brabli. Im blanga yu bos na, en yu garra duwit langa im.

¹²Detlot pipul brom det kantri gulum Taya garra bringim ola presen langa yu, en ola ritjwan pipul garra trai blanga meigim yu dum gudbala ting langa olabat.

¹³Det gel weya garra merrit langa det king, im kaminap langa det bigwan haus. Im brabli purdiwan. Blanga im dres deibin meigim garram golwan kotin.

¹⁴Im werrimbat brabli purdiwan klos, en dei deigim im langa det king, en ola yanggel hu oldei album im du. Olabat bulurrum im olawei biyain blanga go langa det king.

¹⁵Brabli gudbinjiwei dei kaman en gowin langa det bigwan haus blanga det king.

¹⁶Main king, yu garra abum detmatj san na blanga jidan ola king jis laik yu femili bin jidan bifo. En yu garra meigim olabat jidan boswan langa ebri kantri langa dijan wel.