Ola Saam 36:2-7

²Dumaji dei reken miselp, dei reken God kaan faindat blanga olabat nogudbalawei en panishim olabat.

³Olabat oldei tok brabli nogudbalawei en laiyawan wed. Dei nomo jinggabat gudwei en dum rait ting enimo.

⁴Wen dei leidan langa bed, dei jinggabat blanga dumbat nogud ting. Dei nomo dum enijing gud en dei kaan gidawei brom ol detlot nogudwan ting.

⁵YAWEI, yu filing blanga laigim pipul im jidan mowa bigwan raidap langa hebin. En det trubalawei blanga yu im gajimap det skai.

⁶Blanga yu wei nomo garram eni rong. Yu mowa haibala langa ola bigbigwan hil. Yu feyagowan filing jidan detmatj jis laik det dipwan solwoda. Yu oldei lukaftum ola pipul en ola enimul.

⁷God, det filing weya yu laigim pipul olataim im mowa gudwan langa ebrijing. Ebribodi gin go langa yu blanga jidan seifwan, jis laik det lilwan bard, weya jidan seifwan andanith langa im mami.