Ola Saam 21:2-13

²Yubin gibit im wanim imbin wandimbat brabliwei. Yu nomo bin nokambek im wen imbin askim yu.

³Yubin kaman langa im garram ola gudwan ting, en yubin pudum speshalwan golwan het langa im hed.

⁴Imbin askim yu blanga jidan laibala longtaim, en yubin gibit im det olagijawan laif.

⁵Im brabli haibalawan dumaji yubin album im. Yubin meigim im jidan haibala en pipul ebriweya sabi im.

⁶Ola gudwan ebrijing weya yubin gibit langa im garra jidan olagijawan. En im oldei jidan gudbinjiwei dumaji yu na oldei jidan garram im.

⁷YAWEI det Boswan God, det king im trastim yu. Yu garram det olagijawan filing blanga laigimbat det king, en blanga tharran na nomo enijing kaan pudumdan im.

⁸Det king garra grebum im enami olabat en meigim olabat jidan prisana. Im garra grebum ol detlot hu heidim im du.

⁹Wen im kaman langa olabat im garra binijimap olabat laiga bigwan faiya weya im barnbarn. YAWEI garra gitwail en binijimap olabat brabliwei jis laiga bigwan faiya weya barnimap ebrijing brabliwei.

¹⁰Nobodi langa olabat femili garra jidan laibala. Najing. Det king garra kilim ded ol detlot na.

¹¹Detlot enami meigimbat nogudwan plen blanga ardim im, bat dei kaan win. Najing.

¹²Im garra shudum im erro langa olabat, en olabat garra tenaran en ranawei.

¹³YAWEI, melabat preisim yu dumaji yu brabli strongbala. Melabat garra singim song en preisim det brabli strongwan pawa blanga yu.