Ola Saam 147:1-20

¹Preisim YAWEI det trubala God! Im brabli gudwan blanga sing preis song langa wi God. Im brabli gudwan en det raitwei blanga preisim im.

²YAWEI im bildimbek Jerusalem. Im bringimbekbat detlot pipul hubin jidan prisana langa streinja kantri.

³Detlot pipul hu jidan brabli nogudbinji, im meigim olabat jidan gudbinji igin, en im taiyimap olabat sowa garram bendij.

⁴Imbin jinggabat haumeni sta garra jidan, en imbin gulum olabat ronwan neim.

⁵Blanga wi God im brabli haibalawan en strongbalawan. Im sabi blanga ebrijing. Wi kaan sabi brabli blanga im wei.

⁶Im album ola lobala pipul, bat im tjakamdan ola nogudbala pipul langa graun.

⁷Sing preis song langa YAWEI, en plei myusik garram gita langa wi God.

⁸Im pudum ola klaud ebriweya langa skai. Im meigim rein buldan langa dijan kantri, en im meigim gras gro ebriweya langa ola hil.

⁹Im gibit daga langa ola enimul, en wen ola bard jingat im gibit olabat daga.

¹⁰Pipul trastimbat ola strongwan hosis, en ola solja hu nomo bradin blanga enijing langa fait, bat YAWEI nomo laigim detkain pipul.

¹¹Bat im jidan gudbinji langa detlot pipul hu gibit im rispek, en hu trastim langa im olagijawan filing blanga laigimbat olataim.

¹²Pipul blanga Jerusalem, preisim YAWEI! Preisim yu God, Saiyan!

¹³Im meigim strongbala ola geit blanga yu, Jerusalem, en im dum ola gudwan ting langa ol yu pipul olabat.

¹⁴Im nomo larram enibodi kaman en fait langa yu, en im meigim ebribodi jidan sedisfaid garram ola brabli gudwan sid daga.

¹⁵Im gibit oda langa dijan graun, en im duwit streidawei.

¹⁶Im spredimat sno, seimwei laik yu spredimat bleingkit, en im meigim det waitwan ais jidan ebriweya langa graun.

¹⁷Im jandimdan heilston wulijim ston. Nobodi kaan jidan womwan wen im jandim det kolwetha.

¹⁸Brom deya im tok en ola ais meltap. Im jandim win en det woda im stat randan.

¹⁹Imbin gibit im wed en ol im lowa langa im pipul olabat langa Isreil.

²⁰Im nomo bin dum lagijat blanga najalot pipul brom najalot kantri. Dei nomo sabi ol im lowa. Preisim YAWEI det trubala God!