Ola Saam 139:3-18

³Yu sabi weya mi go en weya mi leidan. Yu sabi ebrijing blanga mi brabliwei.

⁴Wen mi stil jinggabat wanim ai garra tok, YAWEI, yu sabi tharran du.

⁵Yu lida langa mi, en yu biyain langa mi, en yu holdim mi garram yu bingga.

⁶Yu sabi mi brabliwei! Ai kaan sabi hau yu sabi mi lagijat.

⁷If ai wandi gowei brom yu, weya ai garra go? Nomo eniweya! Ai kaan gowei eniweya brom yu.

⁸If ai gowap langa hebin, yu deya. If ai godan langa det pleis weya ola dedbala pipul go, yu deya.

⁹If ai flaiwei langa weya det san gidap, o if ai jidan weya det solwoda binij weya det san godan,

¹⁰wal yu deya du blanga lidim mi en album mi. Yu bingga gin holdim mi langa ebri pleis.

¹¹If ai tok miselp, “Ai garra blandim miselp langa dakbala. If nomo lait deya maitbi YAWEI kaan luk langa mi.”

¹²Bat nomo eni dakbala jidan langa yu. Yu gin luk naitaim jis laik yu luk deitaim. Dakbala en lait jidan seim langa yu.

¹³Trubala, wen aibin insaid langa main mami binji, yubin meigim mi brabliwei. Yubin joinimap mi deya insaid.

¹⁴Ai preisim yu dumaji yubin meigim mi klebabalawei. Mi hatjamp wen mi jinggabat tharran. Yu sabi mi brabliwei.

¹⁵Yubin luk mi wen main bodi bin grogro, en wen yubin joinimap mi gudwei deya insaid langa main mami.

¹⁶Yubin luk mi deya wen ai nomo bin brabli beibi, en det taim na yubin sabi blanga mi brabliwei. Yubin sabi wotaim ai garra bon, en wotaim ai garra dai, en yubin raidimdan tharran langa yu buk bifo aibin bon.

¹⁷Main God, ebrijing weya yu jinggabat, olabat gudwan langa mi, mowa den enijing. Ai kaan kaundimap ola difrin ting weya yu jinggabat.

¹⁸Ai kaan kaundim olabat, dumaji dei jidan mowa den ola sengraun. Bat wen ai go silip en wen ai gidap mi stil garram yu.