Ola Saam 119:36-93

³⁶YAWEI, meigim mi wandi kipgon duwit langa yu lowa brabliwei, mowa den blanga meigim miselp ritjwan garram ebrijing.

³⁷YAWEI, meigim mi nomo wandi teiknodis langa ola nogudwan ting. Yu jidan gudbala langa mi, jis laik yubin pramis.

³⁸YAWEI, yu kipum yu pramis langa mi, yu wekinmen, det pramis weya yubin meigim langa ola pipul hu oldei duwit langa yu.

³⁹YAWEI, seibum mi brom ol detlot hu mokimbat mi, dumaji ol yu lowa brabli gudwan.

⁴⁰Mi wandi duwit langa detlot lowa blanga yu. YAWEI, meigim mi jidan gudbalawei igin, dumaji yu det brabli trubalawan.

⁴¹YAWEI, shoum mi haumatj yu laigim mi. Yu seibum mi jis laik weya yubin pramis.

⁴²En ai garra ensim ol detlot pipul hu gibit mi adtaim dumaji mi trastimbat yu wed.

⁴³Album mi tok trubalawei olataim, dumaji mi oldei trastim detlot lowa blanga yu.

⁴⁴Olagijawan na ai garra kipgon bulurrumbat langa yu lowa.

⁴⁵Ai garra jidan friwan brabliwei dumaji aibin bulurrumbat yu wed.

⁴⁶Ai garra dalim ola bigwan bos detlot lowa blanga yu, en ai kaan sheim blanga tharran.

⁴⁷Brabliwei mi laigim dumbat wanim yu dalimbat mi, en tharran na meigim mi jidan gudbinjiwei.

⁴⁸YAWEI, mi laigim en rispek ol yu lowa. Olataim ai garra jinggabat detlot lowa blanga yu.

⁴⁹YAWEI, yu jinggabat det pramis yubin meigim garram mi, yu wekinmen. Im meigim mi wandi kipgon olawei.

⁵⁰Aibin abum trabul bat stil aibin jidan gudbinjiwei, dumaji det pramis blanga yu gibit mi laif.

⁵¹Ola praudbala pipul oldei tok nogudbalawei langa mi, bat ai nomo bin libum detlot lowa blanga yu.

⁵²Mi jinggabat detlot lowa blanga yu brom longtaim, en dei meigim mi brabli gudbinji.

⁵³Wen mi luk ola brabli nogudbala pipul hu nomo teiknodis langa ol yu lowa, tharran meigim mi gitwail brabliwei.

⁵⁴Mi meigim ola song blanga ol yu lowa, nomeda wujei mi jidan.

⁵⁵YAWEI, wen im naitaim mi jinggabat langa yu en blanga yu lowa.

⁵⁶Mi jidanabat brabli gudbinjiwei dumaji mi oldei teiknodis langa yu wed.

⁵⁷YAWEI oni yu na wanbala mi wandim. Mi pramis blanga lisin en duwit langa ol detlot lowa blanga yu.

⁵⁸Mi askim yu brabliwei brom insaid langa main hat blanga sori langa mi jis laik weya yubin pramis.

⁵⁹Aibin jinggabat blanga ola ting weya aibin dumbat, en mi pramis blanga bulurrumbat yu wei.

⁶⁰Wen yu tok, streidawei mi dum wanim yu wandim.

⁶¹Detlot brabli nogudbala pipul bin pudum trep blanga mi, bat ai nomo bin fogedabat yu lowa.

⁶²Mi gidap midulnait blanga preisim yu, dumaji wen yu jadjimbat pipul, yu gibit olabat feyago.

⁶³Mi jidan fren blanga ol detlot pipul hu bulurrum yu, en teiknodis langa detlot lowa blanga yu.

⁶⁴YAWEI, yu garram det filing blanga oldei laigim pipul langa ola kantri. Yu titjimbat mi blanga ol detlot lowa blanga yu.

⁶⁵Yubin kipum yu pramis YAWEI, en yu jidan brabli gud langa mi, yu wekinmen.

⁶⁶Meigim mi sabi ebrijing gudwei, dumaji mi trastim detlot wed blanga yu.

⁶⁷Basdam aibin oldei dum rong ting, bat yubin streitinimap mi en tudei mi teiknodis langa yu wed na.

⁶⁸Yu brabli gudwan YAWEI en yu brabli kainbalawan du. Yu lenim mi detlot lowa blanga yu.

⁶⁹Ola praudbala pipul bin dalimbat ola laiyawan stori blanga mi, bat mi teiknodis langa detlot lowa blanga yu brabliwei brom insaid langa main hat.

⁷⁰Detlot pipul nomo sabi enijing, bat mi oldei gudbinji langa ol yu lowa.

⁷¹Wen yubin streitinimap mi blanga main nogudbalawei, tharran na bin brabli gud ting blanga mi. Imbin meigim mi len ola lowa blanga yu.

⁷²Bigmob mani langa dijan wel nomo enijing langa mi. Oni detlot lowa blanga yu na jidan nambawan langa main laif.

⁷³YAWEI, yubin meigim mi en yu oldei kipum mi seifwan. Meigim mi sabi brabliwei wulijim ai garra len detlot lowa blanga yu.

⁷⁴Ol detlot pipul hu rispek yu garra gudbinji wen olabat garra luk langa mi, dumaji mi trastimbat langa yu wed.

⁷⁵Ai sabi ol yu lowa nomo garram enijing rong en im brabli trubalawan, YAWEI. Yubin panishim mi brabliwei dumaji yu brabli trubalawan.

⁷⁶Larram yu ron filing blanga laigimbat, meigim mi gudbinji, jis laik yubin pramisim mi, det wekinmen blanga yu.

⁷⁷Yu sori langa mi en larram mi jidan laibala, dumaji mi laigim teiknodis langa detlot lowa blanga yu brabliwei.

⁷⁸Larram detlot praudbala pipul sheim miselp dumaji olabat oldei dalimbat laiya stori blanga mi, bat mi, ai garra duwit langa wanim yu titjimbat mi.

⁷⁹Larram ol detlot pipul hu rispek yu kaman langa mi blanga sabi ol yu lowa.

⁸⁰Meigim mi teiknodis langa ol yu lowa brabliwei wulijim ai kaan sheim blanga dum enijing.

⁸¹YAWEI, mi brabli wikwan na brom weidabat blanga wotaim yu garra seibum mi, bat mi trastimbat oni langa yu wed.

⁸²Mi nokap brom weidabat blanga wanim yubin pramisim. Mi askim yu, “Wotaim yu garra album mi?”

⁸³Mi brabli olwan en kaan wek enimo, jis laiga olwan letha but weya nobodi kaan yusum enimo, bat stil ai nomo bin fogedabat detlot lowa blanga yu.

⁸⁴Haulong ai garra weidabat? Wotaim yu garra panishim ol detlot pipul hu oldei dumbat nogudbala ting langa mi?

⁸⁵Detlot praudbala pipul hu nomo teiknodis langa yu lowa bin grajim dipwan hol blanga trepam mi.

⁸⁶Detlot lowa blanga yu, olabat trubalawan. Ola pipul gibitbat mi adtaim garram ola laiyawan stori. Yu album mi, YAWEI.

⁸⁷Olabat bin gulijap kilim mi ded, bat ai nomo bin fogedabat detlot lowa blanga yu.

⁸⁸YAWEI, dumaji yu kipgon laigimbat pipul detmatj, wal yu nomo larram mi dai wulijim ai garra teiknodis langa ol yu lowa.

⁸⁹YAWEI, blanga yu wed garra jidan olagijawan. Im olagijawan deya langa hebin.

⁹⁰Det trubalawei blanga yu im kipgon olagijawan. Yubin meigim dijan wel blanga jidan langa im raitwan pleis, en im jidan lagijat olagijawan.

⁹¹YAWEI, garram yu ronwan wed yubin meigim ebrijing en olabat jidan tudei, en ebrijing na wek laik yubin tok.

⁹²If ai nomo bina abum detlot lowa blanga yu blanga meigim mi gudbinji, ai bina dai brom main trabul.

⁹³Ai nomo wandi libum detlot wed weya yubin titjimbat mi, dumaji olabat meigim mi jidan gudbalawei.