Ol Provep 24:8-24

⁸Waea pape mada agu kone niminaalia aare nipu pupikagi nape aa yade teme.

⁹Wae kone imi aanuni oro yalo nimu wae pupitagi nape kone agu niminawaeme. Go pemea luaburi waeana re luabu yade. Aanumi ademe raburi nimu ora wae aanu-rupa ademe.

¹⁰Gore wae yapi-di meda ne alalia rabu nena uni omapaawa ne ora puri ogesi-da page meda ora nasalia.

¹¹Gore koso-me rumaawa aa meda wae napea pare tumaomatalo palimimiri neme go aa wala puaa raba meape.

¹²Neme apo yaere niaana ya-daa dia pi nalape. Adaa Aa-me ne ora waru suruboa nena oyaenu page waru rumaa gu aaya-ga adape. Goa pua neme go agaana re waru makuape. Gore aanu rayo madaa mo nimuna padane padane laatapu pemeana yoto ruma katea.

¹³Naa si nere epe redepi alumbi apaa nape. Gore epe eta yapulu agaa-para rede ora waru palia.

¹⁴Gorupare neme waru makuaawa adape epe kone-para epe makuae yae lapore rede pi yae meda mua oro yalo pirali. Neme go yaenu mealiri epe-rupa pirua ne abi naomali.

¹⁵Ne wae aa yaliare neme kudiripu pirua epe aa medana ada-para nasuruba pirape. Goa puare nipuna oyaenu paake napape.

¹⁶Gore epe redepone aa wae yaeme malopaaliare nipu oro yalo wala rekaa pitia. Go yapare wae pupitagi ne aanu lopalimiri nimu bebo teme.

¹⁷Nena iaa medame kedaa rialia rabu neme epe pia nalape. Neme oyae meda madaa aa-kidipa pitaawa lopolalo paliare gore neme giri nalape.

¹⁸Gore akolo ya? Adaa Aa-me neme go palide-a adalia rabu mo iaa madaa pape ronore wala ne madaa pina tea-ga waru adape?

¹⁹Neme mo waea pemea adoa kedaame na-omape. Neme goa pali raburi nena kone mabebolalia. Goa pua mo palimide aanu madaa page kone kedaa nameape.

²⁰Dia go aanu nimu epe yae meda mada na-adasalimi. Nimu ora laba paa udinita-rupa mada aipapulu omalimi.

²¹Gore na si nere ora Adaa Aa-na rolo-para page piru aa mudu king-na rolo-para page pawa pirape. Go rabu wae aanu rol0-para napimi-pulu nimu raapu napirape.

²²Go piaene onaare nimu wae yae repara repara aipapulu mealia. Adaa Aa-para aa mudu king lapo-me go piaene onaa-re ake piaene yoto katea palo niaa namakuaema.

²³Epe kone i aanu medalomame go agaa kiritaawa isimi. Gore aa medaloma koso talo peme rabu koso surube aame aa medaloma rabamua medaloma maoyata palimiri otaa.

²⁴Waea pi aa koso mada adialimi pare mo koso pagoa rumae aame nipu na-adini pa penatea. Goa palia raburi ada kagure-nini piri onaame go koso pagoa-rumae aa nipu ero loa marakepeae agaa adaapu teme.