Ol Provep 15:11-29

¹¹Adaa Aa-me aba ome onaa luabu pimi-para ado kiritea. Go su amaa onaa niaana ima kone page luabu ora waru aba ado kiritea.

¹²Aakone i aamere pa aa medame nipu maredepo yaina kone ora na-ia. Goa pea-pulu aa meda-para nipu epe kone gialepa natea.

¹³Gore aa medana robaa-para epe kone saliare nipuna ini agaa-para epealia. Go yapare aa meda nipuna ini agaa-para roke rialiare nipuna robaa-para ota.

¹⁴Epe kone ia aamere puri palo kogono waru pua oyae meape madaa page makuae yae meape mada page kogono pea. Go yapare wae kone i aamere maeyae agaa talo agu pea.

¹⁵Aa meda nipu oyae rudu ta raburi oro yalo kone adaapu sua nipu wae-rupa piruaya. Epe kone sua raana raana-me oroyalo ome aare epe eta nolalo peme rana mada omea.

¹⁶Gore neme oge oyaesinu saa pirua Adaa Aa-na agaa pago ratua nipuna rolo-para piti-daare gore ne epe-rupa pirua kedaa riawa yaeme mone adapu i amope page rabuaniaaya.

¹⁷Aa yago raana ome kone-re ririnane agaa go yade. Nena adami aanu raapu meda-para pirua padi raani no piralimiri gore epeta. Go yapare raana naome aanu raapu gawa midi no pimidi rabuaaye. Gore nimu raapu mena no piri nona palia.

¹⁸Ratu yawea aamere mo aa meda page ratu mayawaya. Go yapare epe lo robaa kumapu i aame aanu medaloma-na kone lo rabaa pawa ma-epeaya. Goa pua nimu lo robaa padane-para sua mapiraya.

¹⁹Kiaa rakepene aamere nipu epe kumapi-rupa pirape yaere ota kone ia. Goa peapulu nipu pa raa rugulua pamuaya. Redepoya pia aa nipu oro yalo kagaa pirape yae epe ta kone ia. Gore epe poranini pamema-rupa madaa.

²⁰Epe kone i naakiri agi aarame raaname omepe. Go yapare naakimi epe pora naratalia-re go naakimi agi aaraa gimaaya.

²¹Epe kone na-i onaa-me maeyae kone ratape page pedo waru peme. Go yapare epe kone ia aamere nipu oro yalo epe kone ratua epea pu aaya.

²²Neme kogono meda pulalo pali-dare aanu adaapuna kone aba meape. Goa pali raburi mo nena palide kogono luabu ora epealia. Go yapare neme aa medana kone namealiri nena kogono ini namadialia rabu pama kalaipu kogono pusali.

²³Aa medalomame agaa lo pitimi rabu riaa lo kiritina loa neme epe agaa meda te-daare go rabu ne page raana palia.

²⁴Epe kone i aare so madaa porana opasari pea-pulu nipu epe-rupa pirape pada puaa mealia. Goa pea-pulu nipu no rolopara-ia poranini pua ome onaana pada wala napua mealia.

²⁵Aa meda nipuna bipa nipuna bi minasalia rabu Adaa Aa-me nipuna ado bebo malalia. Go yapare ona wasa aani aba omere rabamealia. Aa medame go onana su mada namealimi.

²⁶Wae kone luaburi Adaa Aa-na ini agaa madaa pugu waru pea. Goa pea pare epe redepoyoa rolo ti agaa madaare nipuna ini agaa madaa epetada raana waru omea.

²⁷Aa medame mone adaapu orayo kone sua wae pora ratua mealiadare nipuna ona nogo naaki-na rikirane wae keda mea epea. Aa medame nipu mone kanalo omeme pi kone wae narataliare nipu epe-rupa piralia.

²⁸Epe redepone aame kone aba waru niminaawa aa medana agaa orope abuta. Go yapare wae aa-me agaa aipapulu talo pea raburi nipuna agaa wae luabu pa ta.

²⁹Waeanu peme aanu nimuri Adaa Aa raapu repara nae mopare yolamonea aeme. Goa pua nipumi mo epe redepone aanuna betene teme rubu aane lobapaina pirua waru pagea.