Numperis 20:22-29

²²Iwe, ekewe aramasen Israel meinisin ra sai seni Kates o tori ewe chuk Hor.

²³Iwe, ewe Samol mi Lapalap a üreni Moses me Aaron me fäsonun ewe chuk Hor won kiännin ewe fanü Etom,

²⁴“Aaron epwe mäla o chufengen me an kewe lewo. Pun Aaron esap tolong lon ewe fanü üpwe ngeni ekewe aramasen Israel, pokiten oua ü ngeni ai allük arun ewe kolukun Meripa.

²⁵Kopwe emwenätä Aaron me Eleasar nöün we mwän won ewe chuk Hor.

²⁶Mürin, kopwe pwiliti seni Aaron üfan kewe üföüfen souasor o aüföüfätä won Eleasar. Iwe, Aaron epwe mäla ikenan o chufengen me an kewe lewo.”

²⁷Iwe, Moses a föri usun mine ewe Samol mi Lapalap a allük ngeni. Ra mwinetä won ewe chuk Hor fän mesen ekewe aramas meinisin.

²⁸Iwe, Moses a pwiliti seni Aaron üfan kewe o aüföüfätä won Eleasar nöün we mwän. Iwe, Aaron a mäla ikenan won ungen ewe chuk. Mürin, Moses me Eleasar ra feitiu me won ewe chuk.

²⁹Nge lupwen ekewe aramasen Israel meinisin ra silei pwe Aaron a mäla, ir meinisin ra kechüeiti Aaron lon ükükün ilik rän.