Numperis 16:33-42

³³Iei usun ir meinisin ra feilmanauetiu lon lenien sotup fiti pisekir meinisin. Iwe, ewe pwül a pwölürela pwe ra mola seni me lein ewe mwichen aramas.

³⁴Iwe, ekewe chon Israel meinisin mi nom ünükür ra sü, lupwen ra rong ar puchör. Ra puchör le apasa, “Sipwe sü pwe ewe pwül esap pwal oromikichela.”

³⁵Nge ekkei a feitiu seni ewe Samol mi Lapalap o kenala ekewe ruopükü lime mwän mi eäni ekewe asoren ötüöt.

³⁶Mürin, ewe Samol mi Lapalap a kapas ngeni Moses,

³⁷“Kopwe üreni Eleasar nöün ewe souasor Aaron we mwän, epwe angei ekewe sepien asoren ötüöt seni lon molien ewe ekkei, pun ra pin. Epwe pwal atoropasala molien ewe ekkei ekis toau.

³⁸Nge ekewe sepien asoren ötüöt än ekewe mwän mi mäla pokiten ar tipis, repwe nechenech o achöpöp pwe pwölüpwölün ewe rongen asor. Pokiten ra aea le asor me fän mesen ewe Samol mi Lapalap, iei mine ra pin. Iwe, repwe eu asisilen fön ngeni ekewe aramasen Israel.”

³⁹Mürin, ewe souasor Eleasar a angei ekewe sepien asoren ötüöt mi för seni piras, chokewe mi kar ra aea le asor. Iwe, a necheer o achöpöpüür pwe pwölüpwölün ewe rongen asor.

⁴⁰Iwe, ekei pisek repwe achema ngeni ekewe aramasen Israel, pwe esap wor eman epwe kanoto pwe epwe keni apach mi pwokus fän mesen ewe Samol mi Lapalap, chilon chök ekewe mwirimwirin Aaron, pwe esap fis ngeni usun mine a fis ngeni Kora me chienan kewe. Iwe, ra föri meinisin usun mine ewe Samol mi Lapalap a allük ngeni Moses fän iten Eleasar.

⁴¹Nge sorotän ewe rän ekewe aramasen Israel ra lal ngeni Moses me Aaron o apasa, “Ämi oua niela nöün ewe Samol mi Lapalap aramas.”

⁴²Iwe, lupwen ekewe aramas ra chufengen pwe repwe ü ngeni Moses me Aaron, ra kul ngeni ewe imw mangaku ia aramas ra churi Kot ie o küna pwe ewe kuchu a pwölüöla o lingen Kot a pwä.