Numero 26:2-26

²“Sinsusa niw is kada pemilya te tivuuk he keet-etawan te Israel sumalà te pemilya zan–sikan is langun he maama he 20 he tuig is penuiǥen dan pehendiyà te metikang he egkehimu he edsunderuwen te Israel.”

³Umbe, mibpekidlalag si Moises wey si Eleazar he memumuhat te menge Israilihanen diyà te suǥud te Moab he kilid te Wahig he Jordan he uvey te Jerico.

⁴Kesikandan diyà te kandan te, “Sinsusa niw is menge maama he 20 he tuig is penuiǥen dan pehendiyà te metikang, sumalà te insuǥù te Nengazen ki Moises.” Iyan heini menge Israilihanen he migawas puun te Ehipto:

⁵Is menge kevuwazan ni Reuben te kinekekayan he anak ni Jacob, iyan is pemilya ni Hanoc, Palu,

⁶Hezron, wey Carmi.

⁷Iyan sikandan menge pemilya he ebpuun diyà te ki Reuben; 43,700 sikandan is langun.

⁸Is anak ni Palu iyan si Eliab,

⁹ne is menge anak ni Eliab iyan ensi Nemuel, Datan, wey si Abiram. Heini si Datan wey si Abiram iyan menge pengulu te menge etew he nekidsevaha ki Kora te kebpekidsukulà te Nengazen pinaaǥi te kegkuntedaha zan ki Moises wey ki Aaron.

¹⁰Piru mid-eveleng sikandan te tanà duma ki Kora, ne sikan 250 he sumusunud kandan nemematey pinaaǥi te hapuy. Heini he hitavù nehimu he petizaan diyà te menge Israilihanen.

¹¹Piru is menge anak ni Kora, wazà mulà mebpatey zutun he hitavù.

¹²Is menge kevuwazan ni Simeon iyan is menge pemilya eni, Nemuel, Jamin, Jakin,

¹³Zera, wey Shaul.

¹⁴Iyan sikandan menge pemilya he ebpuun diyà te ki Simeon; 22,200 sikandan is langun.

¹⁵Is menge kevuwazan ni Gad iyan is menge pemilya eni Zefon, Hagi, Shuni,

¹⁶Ozni, Eri,

¹⁷Arod, wey Areli.

¹⁸Iyan sikandan menge pemilya he ebpuun diyà te ki Gad; 40,500 sikandan is langun.

¹⁹Si Juda zuen din dezuwa he anak he maama he iyan si Er wey si Onan, he minatey ziyà te tanà he Canaan. Piru zuen gihapun menge kevuwazan ni Juda he iyan is menge pemilya eni Shela, Perez, wey Zera.

²¹Is menge kevuwazan ni Perez iyan is menge pemilya eni Hezron wey Hamul.

²²Iyan sikandan menge pemilya he ebpuun diyà te ki Juda; 76,500 sikandan is langun.

²³Is menge kevuwazan ni Isacar iyan is menge pemilya eni Tola, Pua,

²⁴Jashub, wey Shimron.

²⁵Iyan sikandan menge pemilya he ebpuun diyà te ki Isacar; 64,300 sikandan is langun.

²⁶Is menge kevuwazan ni Zebulun iyan is menge pemilya eni Sered, Elon, wey Jaleel.