Numero 23:13-27

¹³Ne migkeǥiyan ni Balak te, “Ebpezumehè ki ziyà te sevaha pa he lugar he zutun egkeehè nu is senge vahin dà duen te menge etew te Israel, ne kenà langun sikandan. Ne zutun rewaki nu sikandan.”

¹⁴Umbe, miduma ni Balak si Balaam diyà te sevaha he vevesukà diyà te Zofim, he ziyà te puntur te Pisga, ne zutun mibpevaal sikandan te pitu he pemuhatà ne nemuhat dan te pitu he tudu he vaka wey pitu he kerehidu, tigselimbaha ziyà te kada pemuhatà.

¹⁵Migkaǥi si Balaam diyà te ki Balak te, “Kayi ke zà te avey te pemuhat nu he edtutungen su ebpekidhinguma a mulà te Nengazen diyà te egkehunaan.”

¹⁶Ne nekidhinguma is Nengazen ki Balaam ne migkaǥi zin is ibpekaǥi zin ki Balaam. Ne migkeǥiyan din te, “Likù ka ziyà te ki Balak ne keǥiya nu heini he menge lalag.”

¹⁷Umbe, midlikù si Balaam diyà te ki Balak, ne neehè din heini he edhithitindeg diyà te avey te pemuhat din he midtutung, duma te menge pengulu te Moab. Mid-insà si Balak diyà te ki Balaam te, “Hengkey is migkaǥi te Nengazen diyà te kenikew?”

¹⁸Migkaǥi si Balaam te, “Hendini ka Balak he anak ni Zipor, ne pemineǥa a kenikew.

¹⁹Is Megbevayà kenà iring te etew he edtarùtarù; kenà egkahalin is isip din. Duen be nekaǥi zin he ebeelan din he wazè din beeli? Duen be saad din he wazè din tumana?

²⁰Midsuǥù e zin he tuvazi ku is daan en he midtuvazan din, ne kenè ku en heini egkevelvelewanan.

²¹Wazè ku naahà he kezeetan etawa kelised he egkehitavù diyà te Israel. Mibpekiduma kandan is Nengazen he Megbevayè dan; egkilelaan dan sikandin he hadì dan.

²²Impeǥawas sikandan te Megbevayà diyà te Ehipto; iring sikandin te mezesen he vaka.

²³Wazà beyilan etawa barang he ed-uteng diyà te kandan. Umbe egkaǥi is menge etew mehitenged te Israel te, ‘Utew egkein-inuwi is mibeelan te Megbevayà diyà te Israel.’

²⁴Heini he menge etew iring te erimaung he andam he edawi ne kenà edhimeley taman te egkekaan din is ebiktimahan din wey egkesupsup din is lengesa kayi.”

²⁵Ne migkaǥi si Balak diyà te ki Balaam te, “Emun kenè nu sikandan edrewakan ne kenè nu zaan tuvazi!”

²⁶Ne midtavak si Balaam te, “Kenè be migkaǥi ku en diyà te kenikew he kinahanglan he ebeelan ku is egkeǥiyen te Nengazen kayi te kedì?”

²⁷Mid-uman megkaǥi si Balak diyà te ki Balaam te, “Hendini ka, su edumahan ku sikew ziyà te selakew en maan he lugar. Su kela ke zutun he lugar ebpezumezume en is Megbevayà he edrewakan nu is Israel para kedì.”