Numero 15:9-14

⁹kinahanglan he mebpemuhat daan sikandin te pemuhat he para gasa he heenem he kilu he meupiya he kelasi te herina he edsehuǥan te zezuwa he litru he lana.

¹⁰Edlepikan pa heini te pemuhat he inumen he zezuwa he litru he vinu. Is kehemut kayi he pemuhat te pinaaǥi te hapuy ne ebpekepenunuat kedì.

¹¹Iyan heeyan beeli niw emun ebpemuhat kew te tudu he vaka etawa meǥurang en he meemahan he kerehidu etawa nati he kerehidu etawa kambing.

¹²Beeli niw heeyan diyà te kada sevaha he uyaǥen he ibpemuhat niw.

¹³“Is langun he tutuu he Israilihanen he ebpemuhat te menge pemuhat pinaaǥi te hapuy he mehemut he pemuhat he ebpekepenunuat kedì, kinahanglan he edsunud keniyan he menge sulunuzen.

¹⁴Ne is kenà menge Israilihanen he ed-ubpà duma keniyu, pirmeninti etawa kenà, he egkesuat he ebpemuhat te pemuhat pinaaǥi te hapuy he mehemut he pemuhat he ebpekepenunuat kedì, kinahanglan he edsunud dan daan keniyan he menge sulunuzen.