Numero 11:19-34

¹⁹Ne is kebpekekaan niw kayi, ne kenè dà seled te senga andew, etawa zezuwa he andew, etawa lelima, etawa sepulù, etawa 20 he andew,

²⁰kekena, senge vulan, taman te igkeutè niw heini su edsemuwen kew en. Su inselikwey a keniyu is nekiduma keniyu, ne midriklamu kew kayi te kedì he ke sikiyu te, deyzey pa ke wazè kew en med-awà diyà te Ehipto.’ ”

²¹Piru migkaǥi si Moises te, “600,000 langun is menge etew he zuma ku, ne ǥuntaan migkaǥi ka he ebeǥayan nu sikandan te usa he egkekaan dan seled te senge vulan?

²²Minsan edlepaan dey pa is langun he menge kerehidu wey menge vaka etawa edhingutelen dey is langun he isdà diyà te zaǥat ne kenè pa ereg kandan.”

²³Migkaǥi is Nengazen diyà te ki Moises te, “Duen be edtemanan te ǥehem ku? Egkeehè nu ǥuntaan ke egkeulaula ve is migkaǥi ku etawa kenà.”

²⁴Umbe, migenat si Moises ne migkeǥiyan din is menge etew zuen te migkaǥi kandin te Nengazen. Midtiǥum din sikan is 70 he menge perezumala ne impehitindeg din diyà te peliǥuy zuen te tulda.

²⁵Ne mibulus is Nengazen pinaaǥi te ǥapun ne nekidlalag ki Moises. Ne imbeǥey zin duen te 70 he menge perezumala is duma he keǥehem. Ne hein diyè en haazà te kandan ne nenagnà sikandan, piru wazè en haazà meuman-uman.

²⁶Duen dezuwa zuen te 70 he menge perezumala he wazà med-awà diyà te kampu ne wazè dan medhendiyà te tulda he iyan si Eldad wey si Medad. Piru nekaangken gihapun sikandan te keǥehem ne ebpemenagnà daan sikandan dutun te kampu.

²⁷Ne zuen betan-en he maama he mibpelelaǥuy pehendiyà te ki Moises he ke sikandin te, si Eldad wey si Medad ne nenagnà diyà te kampu.

²⁸Ne si Josue he anak ni Nun, he nehimu he timbang ni Moises puun te vetan-en pa sikandin, migkaǥi ziyà te ki Moises te, “Datù, ipeengked nu sikandan.”

²⁹Piru midtavak si Moises te, “Ingkeipeng nu ve he ebpekezezaat heini te kegkepengulu ku? Emun iyan e zà ebpekevayàbayà, egkesuat a he pudu veǥayi te keǥehem te Nengazen is menge etew zin su para pudu zan mekepenagnà iring te menge ebpeneuven.”

³⁰Ne kegkepasad dutun midlikù si Moises wey haazà is menge perezumala te menge Israilihanen diyà te kampu.

³¹Ne zutun impepengeramag te Nengazen te ebpekeuwit te menge piyuǥù puun te zaǥat. Ne nemenlayang dan diyà te peliǥuy te kampu he tetelu he ǥiek is ketikang dan puun te tanà, ne nepipira he kilumitru is keluǥayad wey keluag te tanà he nezebpakan dan.

³²Umbe, zutun te tivuuk he andew nengapul is menge etew taman te mezukilem wey taman en te sunud he andew. Ne wazà mebminus te nengkelibu he kilu is nekuwa te kada sevaha kandan, ne impengagkag dan haazà diyà te peliǥuy te kampu.

³³Iyan, wazè dan pa haazà maamin ne utew en sikandan nepeuki te Nengazen, ne mibpeeǥiyan din sikandan te kezeetan.

³⁴Umbe, migngezanan haazà he lugar te Kibrot Hataava su zutun ipenleveng is menge etew he seseveleken te usa.