Numbers 25:4-18

⁴me ga’ar ngak Moses, “Mu fek gubin e pi lolugen epi yuke girdi’ nu Israel, ma ga fol rog, ngam li’rad ngarm’ad ni kab rran; ma aram e bay i m’ay e damumuw rog ngak e girdi’.”

⁵Me ga’ar Moses ngak e pi tayugang’ niyad ma puf oloboch, “Ra bigmed me thang e pogofan rok gubin e pumo’on ko ganong rok ni un i tayfan Baal u Peor.”

⁶Ma bay be’ nib mo’on nu Israel ni fek be’ ni bpin nu Midian nga langgin e Tent rok u p’eowchen Moses nge gubin fapi girdi’, ko ngiyal’ ni ba’aram ni yad be siro’ u fithik’ e meyor u langan e mab ko fare Tent u p’eowchen SOMOL.

⁷Ma nap’an ni guy Finehas nib mo’on ni fak Eleazer nib mo’on ni fak Aron ni prist, me sak’iy nge chuw u fithik’ fare ulung. Me yan i fek ba sarey,

⁸nge lek dakan fare mo’on nge fare pin nga langgin fare Tent, me pag fare sarey nge kuruf row ni yow l’agruw. Aray e n’en ni rin’ me tal fare misilpig nike gafgownag yu Israel,

⁹machane re misilpig nem e ke li’ 24,000 e girdi’.

¹⁰Me ga’ar SOMOL ngak Moses,

¹¹“Bochan e n’en nike rin’ Finehas, ma kem’aynag e damumuw rog ngak e girdi’ nu Israel. Ya deyag rok ni k’adan’ ko tayfan ni yibe tay ngak yug reb e got ni gathi gag, aramfan ni da gu thang owcharad u fithik’ e damumuw rog.

¹²Ere mog ngak ni nggu ngongliy reb e m’ag ko gapas u thilmow ni nge par ni aram e pow riy e chiney i yan ngaram.

¹³Ni ir nge pi’in bay yib ni owchen e ke duwgil ni yad e prist ndariy n’umngin nap’an, ni bochan e de k’adan’ ko togopluw ni yibe tay ngog, ni aram fan ni kan n’agfan e denen ko girdi’.”

¹⁴Fithngan facha’nem nu Israel nni li’ row fare pin nu Midian e Zimri nib pagel ni fak Salu, ni ir e chitamngin reb e tabnaw u lan fare ganong rok Simeon.

¹⁵Ma fithngan fare pin e Kozbi. I Zur, e chitamngin, ni ir e mit e thin u bu’ulung i girdi’ rok yuke girdi’ nu Midian.

¹⁶Me l’oeg SOMOL Moses,

¹⁷“Mu cham ngak piyu Midian, ngam thangrad,

¹⁸ni bochan e kireb ni ur rin’ed ngom u nap’an ni da ur yul’yul’gad ngom u Peor, nge bochan i Kozbi, nli’ nge yim’ ko fa ngiyal’ i n’em ni bay e misilpig u Peor.”