Numbers 24:3-25

³me weliy e re yi’iy ni ba’aray: “Thin rok Balaam ni fak Beor, thin rok fa’anem ni kan bing owchen,

⁴mrayag ni nge rung’ag e n’en ni be yog Got; nni piliyeg e changar rok me guy e tin nike dag Got ngak, ni Got ni Gubin ma Rayag Rok.

⁵Rib fel’ e pi Tent rok yu Israel,

⁶ni bod yu thal i gek’iy ni palm nib k’af, ara yungi woldug ni bay u to’oben e lul, ni bod e gek’iy ni aloes ni SOMOL e ke yung, ara gek’iy ni cedar ni bay u to’oben e ran.

⁷Pire’ e n’uw nra aw ko nam rorad, miyad yung awochngin e woldug rorad ko milay’ nike aw e n’uw ngay. Pilung rorad e ra ga’ buguwan ngak Agag, ma gagiyeg ni ngi i tay e bay i ga’ i yan.

⁸Got e fekrad nga wuru’ yu Egypt; me cham ni fan ngorad ni bod rogon ba garbaw ni pumo’on ni damumuw. Yad ma ful’ e pi to’ogor rorad, miyad bilbilig yilrad, miyad tet’ar gan e gat’ing rorad.

⁹Yu Israel e bod ba layon nib gel; ra be mol ma dariy be’ nra ga’aran’ ni nge pug. En nra fal’eg wa’athan yu Israel e ra fel’ wa’athan, ma en nra bucheg wa’athan yu Israel e ra buch wa’athan.”

¹⁰Me unguy Balak e tug ni kari damumuw me ga’ar ngak Balaam, “Kug piningem ni ngam yibil ngam bucheg wa’athan e pi to’ogor rog, machane nga dalip yay ni kam fal’eg wa’athrad.

¹¹Ere mu sul nga tafnam! Kug micheg ngom ni bay gu pi’ puluwom nib tolang, ma SOMOL e de pagem ni ngam rin’ e tin ku gu ning ngom, are dab ni pi’ puluwom.”

¹²Me fulweg Balaam ni ga’ar, “Gog ngak fa picha’ ni mol’oegrad ngarbad ngog,

¹³ni mus ni fa’an ga ra pi’ ngog urngin e silber nge gol ni bay u tabinaw rom, ma SOMOL ku ir e gu ra fol rok. N’en ni kug weliy e rrogon nike yog ngog.”

¹⁴Me ga’ar Balaam ngak Balak, “Chiney e nggu sul ngak e tirog e girdi’, machane som’on e nggog ngom e n’en ni bayi rin’ e girdi’ nu Israel ngak e girdi’ rom ko tin bay yib e rran.”

¹⁵Ma aram me yog e re yi’iy ni ba’aray: “Thin rok Balaam ni fak Beor, thin rok fa’anem ni kan bing owchen,

¹⁶nrayag ni nge rung’ag e n’en ni be yog Got, ma en ni Th’abi Tolang e ma pi’ ngak e tin nge nang; ni piliyeg e changar rok me guy e tin nike dag Got ngak, ni Got ni Gubin ma Rayag Rok.

¹⁷Kug guy e tin bay nga m’on e rran, ma kug guy yu Israel. Ba’ ba pilung ni bod ba t’uf ni ba ga’ ram’en ni bayi sum rorad. Rogon ba t’uf ni ba ga’ ram’en e aram rogon ni bayi yib rok yu Israel. Bayi li’ e pi’in yad ma yog e thin rok yu Moab, me thirif u but’ urngin e pi’in yad ba uf ma yad ma togopluw.

¹⁸Bayi gel ngak e pi to’ogor rok u Edom me tafnay e nam rorad, me par yu Israel ni be gel i yan.

¹⁹Yu Israel e bay i yot’yot’rad nga but’ me thang owchen e pi’in yad ra magey.”

²⁰Mi ni piliyeg e changar rok Balaam me guy piyu Amalek me weliy e re yi’iy ni ba’aray: “Yu Amalek e immoy ni ir e ba th’abi gel u fithik’ e pi nam, machane bayi taw ko tomur min thirif u but’.”

²¹Mi ni piliyeg e changar rok me guy e pi Kenite me weliy e re yi’iy ni ba’aray: “Gin ni gimed be par riy e bfel’ rogon ni gowa dabi buch ban’en romed, ni bod ba tafen e arche’ ni bay u thilin e war nib tolang,

²²machane gimed e pi Kenite e bay ni thirifmed u but’ ko ngiyal’ ni bayi fekmed yu Assyria ni kam manged kalbus.”

²³Me weliy Balaam e re yi’iy ni ba’aray: “Mini’ e pi girdi’ nem ni yad be mu’ulung ko lel’och?

²⁴Salthaw e bay ra afgad nga barkow u Cyprus ngarbad ni mael; bay ra koled yu Assyria nge yu Eber, machane bay nthang owcherad.”

²⁵Me sul Balaam nga tafen, me yan Balak.