Numbers 20:6-26

⁶Me chuw Moses nge Aron u p’eowchen e girdi’ nga ranow ra sak’iygow nga langan e mab ko fare Tent u p’eowchen SOMOL. Mi yow paraw nga but’, me m’ug ngorow ram’en SOMOL ni be mluplup’.

⁷Me ga’ar SOMOL ngak Moses,

⁸“Mu fek fare ley i sog ni bay u m’on ko fare Kahol ko M’ag, mi gimew kunuy Aron e girdi’ ni gubin. Mu p’eowcherad ni yad gubin e ngam non riy ko re war ni ba’aram me po’ e ran riy. Irera’ rogon me yib e ran nga but’ ko re war nem nge unum e girdi’ nge gamanman rorad.”

⁹Me yan Moses i fek fare ley i sog ni bod nike yog SOMOL ngak.

¹⁰Miyow ulunguy Aron yu Israel ni urngin nga m’on ko fare war, me ga’ar Moses, “Gimed e pi tatogopluw nir, mu telmed! Mogned, gimed be leamnag ni nggu fekew e ran ko re war ney ngam unumed?”

¹¹Me tining Moses fare ley i sog ngalang nge toy ko fare war ni l’agruw yay, me po’ e ran riy nga but’ ni pire’, me unum urngin e girdi’ nge gamanman.

¹²Machane puwan’ SOMOL ngak Moses nge Aron ni ga’ar, “Bochan e de gaman e pagan’ romew ngog ni ngam dagew u p’eowchen yu Israel nib pagan’mew nga gelngig nib thothup, ma aram e dab kum pow’iyew yu Israel ngalan fare nam ni gu micheg ni bay gu pi’ ngorad.”

¹³Ni yodoro’ u Meribah, ni aram e gin ni i togopluw piyu Israel riy ngak SOMOL, mu rom e dag SOMOL riy ngorad ni ir e ba thothup.

¹⁴Me pi’ Moses e pi mol’og u Kadesh ngranod ko pilung nu Edom nge lungrad ngak, “Ba’aray e thin nike yib rok pi walagem ni fapi ganong nu Israel. Ga manang urngin e gafgow ni kug ted,

¹⁵nge rogon ni yan e pi ga’ romad nga Egypt, ma gamad par u rom ni pire’ e duw. Mi i gafgownag yu Egypt epi ga’ romad nge gamad,

¹⁶ma gamad wenig ngak SOMOL ni nge ayuwegmad. Me rung’ag e meybil romad me pi’ ba engel nge yib nge pow’iymad nga wuru’ yu Egypt. Chiney e gamad bay u Kadesh, nib binaw ni bay ko mathil ko nam rom.

¹⁷Mu runguymad nggu milekaggad u lan e nam rom nggu warod ko gin ni gamad be sor ngay. Gamad nge garbaw romad e dab gu thum’gad nga wuru’ e kanawo’ fa gu warod nga daken e milay’ rom ara woldug rom ni grapes, ma dab gu unumed e ran ko pi luwed rom. Bay gu warod u kanawo’ nggu warod nga wuru’ e nam rom.”

¹⁸Me fulweg piyu Edom ni lungurad, “Dab gu paged gimed ngam bad ngam marod u lan e nam romad! Fa’an gimed ra yib ma gamad ra m’ag e mael ngomed.”

¹⁹Me ga’ar piyu Israel, “Bay gu warod u kanawo’, ma gamad nge gamanman romad e fa’an gamad ra unum e ran romed ma gamad ra pi’ puluwon, kemus ni nggu bad u lan e nam romed nggu warod nga baraba’.”

²⁰Miki ga’ar piyu Edom, “Dabiyag!” Me yib e salthaw rorad nib pire’ ni ngar maelgad ngak yu Israel.

²¹Me cheal yu Israel ngar sorgad ngabang, ni bochan e dabi pag yu Edom yu Israel ngar milekaggad u lan e nam rorad.

²²Me chuw yu Israel u Kadesh ngarbad ko burey ni Hor

²³ni bay ko mathil nu Edom. Me ga’ar SOMOL ngak Moses nge Aron u rom,

²⁴“I Aron e dabi yan ngalan fare nam ni gu micheg ni bay gu pi’ ngak yu Israel; ya nge yim’ ni bochan e mu togopluwgow ko tin gog ni ngam rin’ew u Meribah.

²⁵Mu fek Aron nge fare mo’on ni fak ni Eleazar ngam marod nga daken e burey ni Hor,

²⁶ma ga chuweg e mad ko prist u daken Aron nga mon’ nga daken Eleazar. Ya Aron e nge yim’ u rom.”