Numbers 19:4-11

⁴Ma nge fek Eleazar boch e racha’ riy nga bugul i pa’ nge atngiy ni medlip yay ko gin nib sap mit fare Tent ngay.

⁵Ma fare gamanman ni ga’ngin, nib dachug keru’ ngay, nge ufin, nge racha’ riy, nge gil’iggan e thingar ni urfiy.

⁶Ma aram e nge fek fare prist boch e l’ud ko gek’iy ni cedar nge bochpa’ i hyssop, nge ba yil’ i gaf nib rowrow, nge yon’ e pin’em nga mit e nifiy.

⁷Ma tomuren, e nge maluknag e mad rok, me pu’og e ran nga daken, ma aram e rayag ni yan nga langgin fa gin ni kar n’ufed e Tent riy; machane nge par nib ta’ay nge mada’ ko blayal’.

⁸Ma re mo’on ni orfeg fare garbaw ni bpin e thangri ki maluknag e mad rok me pu’og e ran nga daken, machane ku ra par nib ta’ay nge mada ko blayal’.

⁹Ma be’ nib pumo’on nib be’ech e nge kunkunuy e awat ko fare garbaw nge yan i tay ngabang ni kub tabgul nga wuru’ fa gin ni be par piyu Israel riy, ngu’un cha’riy u rom nge mada’ ko ngiyal’ ni nge fanay yu Israel ko ran ni bangbengin e be’ech. Biney e gam’ing e fan ko denen ni ngan chuweg.

¹⁰Fare pumo’on ni i kunkunuy e awat, e thangri luknag e mad rok, machane ra par nib ta’ay nge mada ko blayal’. Biney e gaming e nge par ni ara’rogon i yan ngaram, ni fan ngak piyu Israel nge girdi’ nu bang ni yad be par u fithik’ piyu Israel.

¹¹Demturug be’ nra math nga ba yam’ e nge par nib ta’ay u lan medlip e rran.