Numbers 18:6-32

⁶I gag e en ni kug mel’eg girdi’em ni pi Levite u fithik’ piyu Israel ni nge mang ba tow’ath ngom. Kan og nagrad ngog, ni aram e rayag ni ngar marwuliyed e maruwel rorad u lan fare Tent.

⁷Kemus ni go’ gur nge pifakam ni pumo’on e bmilfan e maruwel ko liw ko prist ngomed, nib l’ag rogon ko altar nge tin bay u langgin e Gin Th’abi Thothup. Pin’ey e bmil fan ngomed, ya kug pi’ ngomed e binem e liw ni prist nib tow’ath. Ra yib yug be’ nga charen ban’en nib thothup nda npi’ mat’won ma yira thang e fan rok.”

⁸Me ga’ar SOMOL ngak Aron, “Dabi m’ay u wun’um ni gu be pi’ ngom urngin e tin nib mal’eag ni kan pi’ ngog ni dan urfiy ni maligach. Ku gu pi’ ngom nge ngak e pi’in owchem ni ireram e gin f’oth romed ni nge par ni dariy n’umngin nap’an.

⁹U fithik’ gubin e maligach nth’abi thothup ni dan urfiy u daken e altar, ma tin ba’aray e f’oth rom: fapi maligach ni grain, nge maligach ko denen, nge maligach ni mathang malfith.

¹⁰Thingar mu koyed e pin’ey u bang nib tabgul, ni kemus ni go’ pumo’on e ra kay; ngu’um ted e pin’ey nib tabgul.

¹¹“Ma ku arrogon, ni demturug e f’oth nib mal’eag nra pi’ piyu Israel ngog ma fanam. Ya kug pi’ ngom, nge pifakam ni pumo’on nge ppin ni arrogon ni bayi par e chiney i yan ngaram. Gubin chon e tabnaw rom ndariy ban’en nike ta’ay riy e rayag ni kay boch.

¹²“Go’ kug pi’ ngom urngin e tin th’abi fel ko gapgep ni olive, nge wayin, nge grain, nge tin som’on i wom’ngin e woldug ni pi’ yu Israel ngog.

¹³Urngin ma ke milfan ngom. Urngin chon e tabnaw rom ni yad ba tabgul ma rayag ni ngar kayed.

¹⁴“Gubin ban’en u Israel ni kan pi’ ngog e go’ ra milfan ngom.

¹⁵“Gubin e tin nganni’ e bitir ara gamanman ni kan pi’rad ngog e nge milfan ngom. Machane thingar mu fek puluwon ni ngan chuw’iy ngan sulweg e tin nganni’ u fakay, ma ngkum fek puluwon gubin e tin nganni’ u fak e gamanman nib alit.

¹⁶Pi’in bitir e thingar ni chuw’iy ngan fulwegrad ko ngiyal’ nike gaman ta’reb e pul yangarrad ni ba muduwgil puluwon, lal yang e silber, ni aram rogon ni kan duwgiliy e ngiyal’nem.

¹⁷Ma tin nganni’ u fak e garbaw, nge saf, nge kaming e dab kun chuw’iyrad ngan fulwegrad; ke milfarad ngog ni yad gubin ngan maligach ngorad. Ngam atngiyed racha’en fapi gamanman ko altar mi ni orfeg e mam riy nib maligach ni ggan, rib fel’ u wun’ug galo’chngin.

¹⁸Ma ufin ko fapi gamanman e bmilfan ngom, ni bod e ufin u ngorngoren nge ufin u ba’ ni mat’aw i ay nib tow’ath nib mal’eag.

¹⁹“Gubin e tin nib mal’eag e f’oth ni be pi’ yu Israel ngog e go’ kug pi’ ngom nge pifakam ni pumo’on nge ppin. Ku gu micheg e ran’ey ngom nge pi’in ni owchem, ni dabi thil bi’id.”

²⁰Me ga’ar SOMOL ngak Aron, “Dab mu tafnay bang e binaw u lan yu Israel, ma ku dariy bang e binaw rok yu Israel ni yira pi ngom. Ya ngam par ni kemus ni Gag SOMOL, e nge pagan’um ngog.”

²¹I ga’ar SOMOL, “Kug pi’ ngak e Levi urngin e ragag e pasent nike pi’ e girdi’ nu Israel ngog. Irara’ pulworad ko pigpig ni yad be ayweg fare Tent u p’eowcheg.

²²Ma tin kabay e girdi’ nu Israel e dab ra chugurgad ko fare Tent ya yad ra rin’ ma yad ra girengiy e gechig ni yam’ nga dakenrad.

²³Chiney i yan e ngaram, e kemus ni Levite e ngu’ur ayweged fare Tent ma urngin e maruwel riy mab milfan ngorad. Re motochiyel ney e dabi thil ma ku arrogon ni pi’in owchem e ku yad ra fol riy. Ma pi Levite e dab ra tafnayed e binaw nu lan yu Israel,

²⁴ni bochan e kug pi’ ngorad ni farad fapi ragag e pasent ni pi’ yu Israel ngog ni ba f’oth nib mal’eag. Aram fan ni gog ngorad ni dab ra tafnayed e binaw u lan yu Israel.”

²⁵Me motochiyel SOMOL ngak Moses,

²⁶ni nge ga’ar ko pi Levite: “Nap’an ni gimed ra fek fare ragag e pasent rok yu Israel ni nge pi’ SOMOL ngomed ni fenmed, ma dabisiy ni ngam pi’ed ragag e pasent riy nib f’oth nib mal’eag ngak SOMOL.

²⁷Re f’oth nib mal’eag ney e ra yan i par nta’ab rogon ko maligach ni grain nge wayin nib be’ech nma pi’ be’ nma woldug.

²⁸Irera’ rogon ni kigimed ra pi’ fare f’oth nib mal’eag ni fen SOMOL ko urngin e ragag e pasent ni kam fek rok yu Israel. Ni gimed e ngam pi’ed e re f’oth nib mal’eag ney ngak Aron ni prist ni fan ngak SOMOL.

²⁹Ngam pi’ed ko tin th’abi fel’ ni be yag ngomed.

³⁰Nnap’an ni gimed ra pi’ e gin th’abi fel’, ma gin ke magay e nge par romed, nri bod ba girdi’en e woldug nma tay rok e gin ke magay u tomuren nike fal’eg rogon e maligach.

³¹Gimed nge chon e tabinaw romed e demturug e gin’en ni gimed rakay ko gin ke magay ko maligach ni bochan e ireram puluwonmed ko pigpig u lan fare Tent.

³²Dabi yib machan ngomed ko ngiyal’ ni gimed ra kay, ni fa’anra kam pi’ed fa gin th’abi fel’ riy ngak SOMOL. Machane nopa’med ni dab mu darifan naged fapi tow’ath nib thothup nike pi’ yu Israel ngomed. Fa’anra mu abichgad u daken fapi tow’ath u m’on ni dawor mu pi’ed e gin th’abi fel’ riy ma yira thang e fan romed.”