Numbers 16:13-50

¹³Mog dawori fel’ u wun’um ni kam fekmad nga wuru’ yu Egypt nib nam nib yong’ol e but’ riy ngamub mu thangmad ngaray u lan e gi ted ney? Ere gur e ngkum par nib ga’ lungum romad?

¹⁴Ya gathi kam fekmad i yib ngabang i but’ nib yong’ol ara kam pi’ yuyang e flang ngomad nge woldug ni grape ni nggu fi’iyed. Ere mog, chiney e kag be guy rogon ni ngam ban nagmad? Dab gu bow!”

¹⁵Mri damumuw Moses me ga’ar ngak SOMOL, “Dab kum fanay e pi maligach ni be pi’ e pi pumo’on ney ngom. Dawor gu bucheg ban’en rok bagyad; mus nga ta’ab dongki ma dawor gu fek rorad.”

¹⁶Me ga’ar Moses ngak Korah, “Gabul e dabisiy ni ngambad fa 250 i girdi’ ni gimed ngabang ko fare Tent u p’eowchen SOMOL; ma ku bay yib Aron ngaram.

¹⁷Ma ra bigimed ma nge fek e ba’ rok e fen e fek nifiy nge tay e incense ngay, ma aram me pi’ u altar.”

¹⁸Ere gubin fapi pumo’on nra feked e yu raba’ i fen e fek nifiy rorad ngar afed e nifiy nga langgin miyad tay e incense nga daken, miyad sak’iy nga langan e mab ko fare Tent ni yad Moses nge Aron.

¹⁹Ma aram me kunuy Korah gubin e girdi’ nu Israel nga ta’bang, ngar sak’iygad ni yad ba sap ngak Moses nge Aron ni yow bay u langan e mab ko fare Tent. Miyad gin ma ke mat muluplup’en SOMOL nga dakenrad ni yad gubin,

²⁰me ga’ar SOMOL ngak Moses nge Aron,

²¹“Mpaloggow rok e pi girdi’ney, ya nggu thang e pogofan rorad e chiney.”

²²Machane me ragbug Moses nge Aron nga but’ nge math peri’ row ko but’ me lungurow, “Got, I gur e ga ma pi’ e yafos. Ere mog, nap’an nra denen ta’abe’ ma aram e ngam damumuw ngak urngin e girdi’ u lan fare binaw ni ga’ngin?”

²³Me ga’ar SOMOL ngak Moses,

²⁴“Mog ngak fapi girdi’ ngar paloggad u to’oben fapi Tent rok Korah, nge Dathan, nge Abiram.”

²⁵Ma aram me un fapi tayugang’ nu Israel ngak Moses, ngranod ngak Dathan nge Abiram.

²⁶Me ga’ar Moses ngak fapi girdi’ ni gubin, “Mpaloggad ko pi Tent rok e pi pumo’on ney ni yad ba kireb, ma dab kum mathgad nga ban’en ni ferad. Ya ra dangay, ma yira dachuguymed ngorad ngan thang e pogofan romed ni fan ko denen rorad.”

²⁷Ma aram mra paloggad ko fapi Tent rok Korah nge Dathan, nge Abiram. Ma ke yib Dathan nge Abiram nga wean ni yow be sak’iy u mit e Tent rorow ni yad gal le’engirow nge pifakrow.

²⁸Me ga’ar Moses ngak fapi girdi’, “Irera’ rogon mi gimed nang ni SOMOL e ke pi’eg ni ngu’ug rin’ e pi maruwel n’ey, gathigag e kug turguy rog ni ngu’ug rin’ ni gubin.

²⁹Fa’anra yim’ e pichaney nrogon nma yim’ e girdi’, nde pi’ Got e gechig rorad, ma aram e gathi SOMOL e ke loeg’eg.

³⁰Machane fa’anra rin’ SOMOL ban’en ndawor ni rung’ag, ni nge mab e but’ nge ful’ e gali cha’ney nib mu’un urngin e tin nib milfan ngorow ban’en ngranod nga’ar ni kayad bfos nga tafen e yam’, ma aram e kam nanged ni picha’ ney e kar pi’ed keru’rad ngak SOMOL.”

³¹Ma yug nap’an ni mu’ Moses ko numon, me say e but’ u tan Dathan nge Abiram

³²nge ful’ row nge chon e tabnaw rorow, nib mu’un urngin e pi’in yad Korah ngabang nge urngin e chugum rorad.

³³Ma aram mranod nga tan e but’ nga tafen e yam’, nib mu’un e chugum rorad ngorad. Me sul e but’ nga ta’bang nge par nrogon, ma kar m’aygad ngabang.

³⁴Ma urngin e girdi’ nu Israel ni urmed u rom e ra milgad nnap’an nrung’aged lungun fapi girdi’ nra yorgad. Me tolul piyu Israel ni be lungurad, “Da milgad! Ya richey miki ful’dad e but’!”

³⁵Me pi’ SOMOL ba nifiy ni be dramram nge urfiy fa 250 i pumo’on ni kar pi’ed e incense.

³⁶Ma aram me ga’ar SOMOL ngak Moses,

³⁷“Mog ngak Eleazar nib mo’on ni fak Aron ni prist nge chuweg fa yu raba’ i fen e fek nifiy ni bronze nge chuw u fithik’ i awatan fapi pumo’on ni kar mo’orufgad. Nifiy ko fa yu raba’ i fen e fek nifiy e ngan wereg nga bang ya ba thothup fa yu raba’ i fen e nifiy.

³⁸Ke thothup nnap’an e ni pi’ u daken e altar rok SOMOL. Ere mfek fa yu raba’ i fen e nifiy rok fapi pumo’on ni kan thang e pogofan rorad ni bochan e denen rorad. Ngan pirdi’iy e yu raba’ i fen e nifiy nem nge yan i bod yu raba’ i plet nib gilgith, min ngongliy nge mang upongen fare altar. Re upong ney e nge mang ba puguran ngak e girdi’ nu Israel.

³⁹Aram me fek Eleazar ni prist fa yu raba’ i fen e nifiy ngan pirdi’iy nge yan i bod e plet nib gilgith, nge mang upongen fare altar.

⁴⁰Re upong n’ey e ngi i puguran ngak piyu Israel ni yug be’ ni gathi reb i owchen Aron e dabiyag ni nge yib ko fare altar nge urufiy riy fapi incense ni yima pi’ ngak SOMOL. Mra rin’ be’ ma yira thang e pogofan rok ni bod Korah nge pi’in yad ngabang. Urngin e pin’ey nrin’ ni bod rogon ni yog SOMOL ngak Moses ni nge rin’ Eleazar.

⁴¹Me reb e rran riy me tabab yu Israel i gun’gun’nag Moses nge Aron ni be lungurad, “Kam thangew e pogofan rok boch e girdi’ rok SOMOL.”

⁴²Ma nap’an ni mu’ulung yu Israel ni ga’ngin ni ngar togopluwgad ngak Moses nge Aron, miyad cheal u but’ ngar sapgad ko fare Tent mar guyed fare gi manileng nike ing fare Tent ma be mat ram’en SOMOL riy ni be maluplup’.

⁴³Me yan Moses nge Aron ra sak’iygow nga mit fare Tent,

⁴⁴me ga’ar SOMOL ngak Moses,

⁴⁵“Mchuwgow u to’oben e pi girdi’ ney, ya nggu thang e pogofan rorad ni kachingiyal’ ney!” Miyow siro’ ngak SOMOL nge math peri’row nga but’,

⁴⁶me ga’ar Moses ngak Aron, “Mu fek fa raba’ i n’en rom ni fen e fek nifiy ngam af e nifiy u daken e altar nga langgin, ma ga af boch e incense nga langgin. Ma ga papey nigem ngam fek i yan ngak e pi girdi’ nem ngam fal’eg bangbengin e machalbog ni fan ngorad. Mu pay nigem! Ya ke pu’og SOMOL e damumuw rok ke tabab e liliy ni yibe yim’ riy.”

⁴⁷Me fol Aron riy me fek fa raba’ i fen e fek nifiy rok nge mil i yan nga fithik’ fapi girdi’. Me guy nike tabab e m’ar ngak fapi girdi’, me tay fapi incense nga daken e nifiy rok me fal’eg bangbengin e machalbog ni fen fapi girdi’.

⁴⁸Me tal fare liliy, me magay Aron nib sak’iy u thilin e pi’in kabfos nge pi’in karm’ad.

⁴⁹Urngin e girdi’ u gubin nra m’ad e yad 14,700, da ni uneg ngay e tin ni yim’ nnap’an e togopluw ni tay Korah.

⁵⁰Ma nap’an ni tal fare liliy me sul Aron ngak Moses nga langan e mab ko fare Tent.