Numbers 11:5-26

⁵U Egypt e ud ked e nig riy ndariy puluwon, nge kiyuri, nge mayis, nge subuyas, nge garlik.

⁶Ma chiney e kem’ay gelngidad. Dariy ban’en ni ngad ked, kemus ni manna e gadad be kay ni gubin e rran.”

⁷(Re manna nem e bod nochi awoch, ni ba dake maguchol ra’en.

⁸Ma yan e girdi’ ni kakadbul ngar fanged ngar biliged ara ra yowogiliyed, miyad lith ngar ngongliyed e kek nib gilgith riy, bod lamen e kek ni kan lith ko gapgip ni olive.)

⁹Ra mulmul e wa’angachal ni nep’ ko gin be par piyu Israel riy, ma ke un e re manna nem ngay.

¹⁰Me rung’ag Moses lungun urngin e girdi’ ni yad be gun’gun’, nra reb e tabinaw ma ke mu’ulung e girdi’ riy nga langan e mab ko birorad e Tent. Me ri damumuw SOMOL ngorad. Me par Moses ni kari dabuy e ren’em,

¹¹me ga’ar ngak SOMOL, “Mang ni kam gafgow nigeg? Mang e kug rin’ nde magan’um ngay ni er fan ni kam teg ni gag e nge mil fan urngin e pi girdi’ ney ngog?

¹²Gathi gag e gu sunumegrad ara gu gargelegrad! Ere mang ni kamog ngog ni nggu dinobiyrad ni bod be’ ni bpin ni be tathuthnag pifak mu gu fekrad i yan ko fare nam ni gur e mmicheg ngak pi chitamangirad ni kakrom ni bay mpi’ ngorad?

¹³U uw e nggu fek e ufin riy ni yad ra gaman riy ni ara’ urngirad? Kar gafgow niged gag ya yad be yor ngog ni nggu pi’ e ufin ngorad.

¹⁴Dabiyag ni nge mil fan e pi girdi’ ney ngog ni urngin, ya ban’en ni kayigi gel e mo’maw’ riy ngog!

¹⁵Fa’anra irera’ e n’en ni ngam rin’ ngog, me ere mu runguyeg ngam thang e pogofan rog nggu chuw ko gafgow.”

¹⁶Me ga’ar SOMOL ngak Moses, “Mu ulunguy medlip i ragag e pumo’on ni yad ma yog e thin rok yu Israel, mfekrad i yib ngog ko fare Tent u p’eowcheg, ma gog ngorad ni ngar sak’iygad u cherem.

¹⁷Ya bay gub nga but’ nggu welthin ngom u rom, ya bay gu fek boch e gonop ni kug pi’ ngom nggu pi’ ngorad. Miyad un ngom i ayuweg e pi girdi’ ney, me par ni gathi go’ gur e ke mil farad ngom.

¹⁸Nge lungum ngak e girdi’, “Ngam machalbog niged gimed ni fan ko gabul, ya bayi yag e ufin ngomed ni ngam ked. Ya SOMOL e ke rung’ag lammed ni gimed be yoer nibe lungmed manga yigi yag e ufin ngomed ma kabfel’ rogmed ni um pired u Egypt. Ere SOMOL e bayi pi’ e ufin ngomed ngam ked.

¹⁹Ma dabisiy ni ngam ked ni gathi kemus ni ta’reb ara l’agruw e rran, ara lal, ara ragag, ara reliw’ e rran,

²⁰ya reb e pul ni ngam ked ngan chichingeg nga owchemed ni kam dabuyed gol’ochngin, ni bochan e kam pi’ed keru’med ngak SOMOL ni be par u fithik’med ma gimed be gun’gun’nag ma be lungumed a susun e dab mu chuwgad u Egypt.”

²¹Me ga’ar Moses ngak SOMOL, “Nel’ mir’ay e biyu’ e girdi’ ni gu be gafaliyrad, ere kamog ni bay mpi’ e ufin ngorad ni nap’rad reb e pul?

²²Yira li’ e garbaw nge saf ma gur yad ra gaman riy? Gur yad ra gaman u urngin e nig ni bay u maday?”

²³Me fulweg SOMOL ni ga’ar, “Gur bay ban’en ndabiyag rog? Daba’ e bay mu guy ko ra yib i m’ug nib riyul’ e tin kugog ngom fa dangay!”

²⁴Me yib Moses nga wean me yog ngak e girdi’ e tin keyog SOMOL. Me ulunguy medlip i ragag e pumo’on ni yad ma yog e thin rok yu Israel ngarbad ra pired ni kar liyeged fare Tent.

²⁵Me yib bangi manileng nga but’ ni bay SOMOL u fithik’ nge welthin ngak Moses. Me fek boch e gonop nike pi’ ngak Moses nge tay nga laniyan’ fa medlip i ragag i pumo’on ni yad ma yog e thin. Ma fa’ani yib e re gonop nem ngorad, miyad welthin ni bod rogon e profet, ni kemus e yay nra yodoromgad.

²⁶L’agruw ko fa medlip i ragag i girdi’ ni yad ma yog e thin, ni aram Eldad nge Medad e ra pirew ko gin ni bay e pi Tent rok piyu Israel riy ma da ranow ko fare Tent. Mu rom ko gin ni yow bay riy e yib fare gonop riy nga lanin’row, mi yow welthin ni bod rogon e profet.