NARONAA 21:10-23

¹⁰Isarailanↄ dà zɛ́n, akũ ò bùraa kàtɛ Obo.

¹¹Bona Obo ò gɛ̀ɛ ò bùraa kàtɛ Iyɛ'abarimu gbárannan Mↄabunↄ bùsu ifãboki kpa.

¹²Bona gwe ò gɛ̀ɛ ò bùraa kàtɛ Zeredi guvutɛn.

¹³Bona gwe ò bùraa kàtɛ Anↄ bara dire, gbáranna kũ à kú Amↄrinↄ bùsu lɛ́zɛkin. Anↄ pìmɛ Mↄabunↄ kũ Amↄrinↄ bùsunↄ lɛ́zɛki ũ.

¹⁴Abire yãin ò pì Dikiri zĩ̀katakada gũn: Waɛbu kũ à kú Sufa bùsun kũ Anↄ swa'ↄnɛnↄ

¹⁵kũ ń guvutɛ kũ ò tà ari Aranↄo Mↄabunↄ bùsu lɛ́zɛkin.

¹⁶Bona gwe dↄ ò gɛ̀ɛ Lↄ̀gↄ, gu kũ Dikiri pìn Musanɛ: Ǹ gbɛ̃nↄ kakara mà í kpáḿma.

¹⁷Gwen Isarailanↄ lɛ̀ díkĩna sìn: Í bo lↄ̀gↄn, gbasa ò lɛ̀ sínɛ,

¹⁸lↄ̀gↄ kũ ó don'arɛdenↄ yↄ̃̀ kũ línↄ, lↄ̀gↄ kũ kínɛnↄ pà kũ ń gònↄ. Bona gbárannan ò gɛ̀ɛ Matana.

¹⁹Matana gbɛra Naliɛli, Naliɛli gbɛra Bamↄ.

²⁰Bamↄ gbɛra guvutɛ kũ à kú Mↄabunↄ bùsun, gu kũ Pisiga mìsↄ̃ntɛ arɛ dↄ gbárannaa.

²¹Isarailanↄ gbɛ̃nↄ zĩ̀ Amↄrinↄ kína Siↄ̃a ò pì:

²²Ǹ ó gba zɛ́ ò gɛ̃tɛ n bùsuua. Óni pã buranↄ ke geepi líkpɛlaro, óni á lↄ̀gↄ'i miro. Ónigↄ̃ tɛ́ kína zɛ́da gũmmɛ ari ò gɛ́ gɛ̃tɛo n bùsula.

²³Siↄ̃ dí ń gba zɛ́ ò gɛ̃tɛ a bùsuuaro. À a zĩ̀karinↄ kàkara ń pínki, ò bↄ̀tɛ òtɛn gɛ́ńyĩ gbárannan. Kũ ò kà Yaza, ò zĩ̀i kà kũ Isarailanↄ,