Nambas 22:2-12

²Laḡannemo Mowabi ḡalibonana Balak Dipo natuna, i vaiye te bainewa Islael lavedi a tapipila te Amoli lavedi ai peki kovidi. Bi kota i vaiye te Islael lavedi a wapa dabalala,

³ba ena lava vaitedi a naila gulata banina Islael lavedi ba a wapa gulata.

⁴Ḡome Mowabi lavedi Midian waibabadidi a giuwedina gado, “Niga lavedi kumdi male matabuda sai peki kovidana, maibena bulumakau ḡawaḡawa sa kanikani kovidina.”

⁵Mba laḡanemo Dipo natuna Balak tana Mowab ḡalibonana, tauwainoyanoya i wai ḡemotidi bi i giuwedi te sa nawa Beo natuna Beilam lisinemo. Tana Amowa dobunemo gauba Ifleitis diyedimo Petomo i miyamiya. Tauwainoyanoya niga giuna a vai nawe Beilam lisinemo gado, “E ḡoeḡoena kwa sibe te Islael lavedi Idipmo a potipotiyovona, niga dobuna ai wanavu bi diyagumo sa miyamiya. Sawai matanainaila te niga doḡana maso sa vai.

⁶Tedi a wapa gulata mote luvana te ka lauyovoḡedi, taunana aubaina kwa nato bi aubaigu kwa pasilidina, kaka tama ḡemoḡemotina te niga dobunemo ka kwavivaidi. Tagu e sibe te tam laḡannemo lava kwa kavisuvisudina ba tedi visuvisu sa banavi bi laḡannemo kwa pasilidina ba tedi gebogebo sa banavi.”

⁷Kamaina bi Mowabi bi Midian babadidi pasila kana mane a legaudi bi a nawa Beilam lisinemo bi Balak kalinana a giuwe.

⁸Bi Beilam tedi i giuwedina gado, “Temi niga ḡome ta kena bi Bada bai ya giuwegu, kaka bokina yà tainuwataumi.” Ḡome te Mowabi babadidi, Beilam vaitena a kena.

⁹Bi Maimaituwa Beilam lisinemo i laumaḡata bi i giuwena gado, “Lava mabai lisimmo sa miyamiya?”

¹⁰Bi ena giu i waimunena gado, “Dipo natuna Balak mowabi edi ḡalibona kalinana i giuvitedi bi giukamaḡedi lisigumo.

¹¹“Bi i giu te lava Idipmo a potipotiyovona tedi dobu ai wanavu kamaḡe. Taunana aubaina tana ya ḡoeḡoegu te Islael lavedi yà pasilidi, mba mainana te tana Islael lavedi ya kwavi vaidi.”

¹²Bi geḡa te Maimaituwa Beilam i giuwena gado, “Niga babadidi mote vaitedi koma nawa bi mote Islael kuma pasilidi, banina mba lavedi ba tagu e kavisuvisudi.”