Nambase 22:2-12

²Moapena kiŋi Sipona ikinyingi Beleke lenge dokome Isaraele wambu dupwame Amo wambu dupwa kando yulu mende piyaminyi doko soo

³baamoo banya wambupi dupwa peparaeme Isaraele wambu dupwa ama soo kaeyo epo piyaminyisa kando pakayami.

⁴Moape range wambu dupwame Mitiane range akali mupwa dupwa kando leyami. Mena bulamakao kalyuwame rambe akipi nenge kandale doko suu pyao wambu dae epelyaminyi dupwame oo repeta namwana bange dupwa peparae ukiaki minyuo kokwa serami.

⁵Dokona lao kiŋi Belekeme wai minyingi akali lapome Beona ikinyingi Belame yuu Peto ipwa Yuporisa repeta yuu Amau dokona kareyamo doko epena lao lamaila pena leya. Wambu wai pii minyuo pao dopa leyami. Beleke nakama dopa langyuo, Yuu mendakinya wambu peparae Isipi yaki nyuo dae epo yuu dakena wakale wakale raeyo palipala namwana yuu dake nyelana letaminyi doko emba sipili yaka lao langilyu lapya, leyami.

⁶Wambu dupwa ama malu mee namwa isa palyilyaminyi dokona emba waiya lao epo nambana lao nakama koo keta palyuo mende pyakape. Dopa piri ramo namwame kapa pyuo anamasi minyuo yuu dakena pyao ralinyi nembarama rapisi. Embame wambu dupwa elyape keta petena lapinyi dokopa elyape keta petaminyiko. Randa maiyuo koo keta pena lapinyi dokopa kooko keta pelyaminyi. Doko namba silyu.

⁷Dokona lao Moape rangepe Mitiane rangepe akali mupwa dupwame Isaraele wambu dupwa randa maiyuo koo keta pena lara lao Belame kareyamo dokona papala kana mone maiyuo Belekena pii doko lamaiyuo piyami.

⁸Piyaminyi dokopa Belameme nakama lamaiyuo lao, Epapu kukwa nembo dae palimanalese. Dopa pyuo palirama dokopa Kamongome namba pii langiramo dusipa rakya nambame nakama langiru. Dokona lao Moape range akali mupwa dusipa Belamemoo pipya paleyami.

⁹Anatumi Belame kareyamo dokona epapala piso soo, Akali embamoo petaminyi dasipa apimoose? leya.

¹⁰Baame isingi lao, Yuu Moape range kiŋi Beleke dokome pii langyala pena lapyasa imi.

¹¹Doko wambu lapo Isipi yaki nyuo dae epapala yuu dakena wakale wakale nyuo yoko lapala palaminyi lapya. Baame wambu dupwa pyao ralinyi nembaro lao nambame banya lao wambu dupwa randa maiyuo koo keta palyakape lapya, leya.

¹²Anatumi Belame lamaiyuo, Akali dasipa pipya role pyao paa napipi. Nambame Isaraele wambu dupwa elyape keta pisingiŋi dokona randa maiya napipi.