Muqâqiŋ Dâŋ 28:2-21

²Ŋic guru moc jaŋe micne‐jeŋiczi mamana â maŋɋârâŋhec juhuc guriŋ bajareha sâcne sanaŋkerâ juniŋmu, â guru moc jaŋe qaqatara â hehesic boc bâfuapie micnefâc‐jeŋic jaŋe bâipiec‐joparâ ââkehoc eniŋmu.

³Guriŋ bapa ŋic moczi ŋic hapetac bâʒâic‐jopaocmu e hoe mâŋâŋ sâkozi giegaŋ ima baekac irec sâc eocmu.

⁴Ŋoŋe sâcmutâc dâŋ qatarahuc ŋic sindaŋne jaŋe bafic‐jopaniŋmu, â sâcmutâc dâŋ mana rereŋ eniŋmuo ine râsi ejareniŋmu.

⁵Ŋic hehesicne jaŋe tiŋne hata kâuc baeŋgopieŋ, â Wofuŋ araŋ bacneeŋgopieŋ jaŋe ine mana taraeŋgopieŋ.

⁶Ŋic hapetaczi siocmâc juocmu ere manapene fefene eocmu, â ŋic moneŋ mafa sâkoheczi siochec juocmu ere ine manapene wawahane eocmu.

⁷Ŋicmotec moc e sâcmutâc dâŋ mana rereŋ eocmuzi maŋɋârâŋhec juocmu, â moc e ŋic kosa jujune jaŋe âgo ejareocmuzi ine mamac‐ticne mimi qaqa ecneocmu.

⁸Ŋic moc e ŋic âgofâc‐ticne eatuc‐jopahuc wiac‐jeŋic sâctiri jowac rorâ e jahacne moneŋ mafa bâsokaocmuo ine Anutuzi mocwâc jâoc rorâ ŋic hapetac jare tahac eocmu.

⁹Ŋic moczi sâcmutâc dâŋ mana rereŋ mi eocmu e Anutuzi nunumu‐ticnere maname mamakâcne eocmu.

¹⁰Go ŋic sioc tâmiric moczi hata hehesicnao raocte manasuhuc doc barâ nombâŋ romeŋ ira go gahac hucmu; â bahac tâmiriczi ine furi sâko roocmu.

¹¹Ŋic moneŋ mafa sâkohec jaŋe jaŋacne manapie maŋɋârâŋhec juŋgopeneŋ eekac, â ŋic hapetac mamana tarahec jaŋe ine fuŋne‐jeŋic hone taraeŋgopieŋ.

¹²Ŋic tiŋne jaŋe guriŋ bapa gie‐jeŋic tâpirihec bapie ŋic jaŋe ʒeŋgoma ʒeri eniŋmu, â ŋic sindaŋne jaŋe guriŋ bapa gie bapie ine ŋic jaŋe soŋkeniŋmu.

¹³Ŋic moc e bahac‐ticne hesoŋkeocmuzi mi juhâmoocmu, â moc e bahac‐ticne mufuarâ râpeckeha Anutuzi aki anonoc ecneocmu.

¹⁴Ŋic moc e Wofuŋ araŋ bacneocmu ere manapene ʒerine eocmu, â moc e maŋrâŋgeŋ bâfuaocmuzi ine sipirickeocmu.

¹⁵Ŋic sindaŋne moczi ŋic hapetac guriŋ bajareha bititieniŋmu, e laioŋ â bea jahe nânâ opâre hâmohuc momori eekopirec irec sâc eocmu hâcne.

¹⁶Guriŋ bapa ŋic moczi mamana tâmiric juhuc ŋic ʒâʒâicne eocmu, â moc e sioc wiac qikiŋneocmuzi ine guriŋ bapa gie‐ticne dameŋ ʒora barahuc juocmu.

¹⁷Ŋic moc e ŋic âgonere soc hoŋkewecko ine ŋic moczi moc mi bafickeha wise wise jukuhame hâmoc dameŋ‐ticne maickezejec.

¹⁸Ŋic moc e sioc tâmiric juhuc biaŋkeocmu, â moc e siochec juocmuzi sipirickeocmu.

¹⁹Ŋic moc e gie‐ticne he sarac eocmuzi nânâ mâriri sâko bâfuaocmu, â moc e gie bapa dameŋ sipirickeocmuzi ine hapetac erâ juocmu.

²⁰Ŋic sioc tâmiric dameŋ ʒora juhâc qâhâmoocmu, â moc e moneŋ mafa sâkohec eocte ʒoɋac eocmu e ine bâbâtiŋ fuacneocmu.

²¹Ŋic mana wosâc ejarepene mi sâckeocmu. Mumutara ŋic gâcne jaŋe bâbâmiriŋ moneŋ huŋgaŋne mac sawa rohuc wiac hehesicne eniŋte manapie mi quŋkeocmu.