Zinama Tumatumae 28:2-21

²Pana va gugue sa butubutu la koasa Tamasa, kote soku sari na koimata, ba sa tie gilagilana meke tumatumaena si kote kopu nia sa binaṉara pa binule.

³Sa baṉara sapu ṉoṉovali sari tie malaṉa si guana ruku kokoreo sapu huari sari na linetelete.

⁴Arini pu kilua sa tinarae si qetuni sari tie kaleadi, ba sarini pu kopu nia sa tinarae si lopu ta qetue koa rini.

⁵Sari tie kaleadi si lopu tumae nia sa tinoṉoto, ba arini pu lulia sa hiniva te Zihova si gilana valeania.

⁶Leana be na tie malaṉa, sapu lopu ta zutu nana tinoa, hola nia sa tie tagotago sapu kaleana nana hahanana.

⁷Asa pu kopu nia sa tinarae si na koburu gilaena, ba na baere tadi na ṉaṉaluta si na kinurekure tanisa tamana.

⁸Asa pu va tomotomo la koa sa lipulipu pude tagotago, si va naqiti ponia si keke pu kote tataru ni sari tie malaṉa.

⁹Be keke tie si va taliṉa va seu koasa tinarae, sari nana vinaravara ba kote avoso hikare koe Zihova.

¹⁰Asa pu turaṉia sa tie toṉoto pa siraṉa kaleana si kote hoqa la pa nana sipata telena, ba sa tie loke tina zutuna si kote ta pia va leana.

¹¹Sa tie tagotago si gilaena, gua si asa, ba sa tie malaṉa pu gilagilana boka dogoro vagia mo gua sapu hinokara.

¹²Totoso bokaboka sa tie toṉoto si qetuqetu sari na tie; ba totoso vagi ṉiniraṉira sari na tie kaleadi, si la tome sari tie.

¹³Asa pu tomei sari nana sinea si lopu koa va leana, ba asa pu helahelae ni meke veko pani si ta taleosae koe Tamasa.

¹⁴Mani tamanae sa tie pu pamaṉa nia doduru totoso se Zihova, ba asa pu korona pa bulona si kamo la pa tinasuna.

¹⁵Guana laione kurumuna babe na totorona sa bea sa tie kaleana pu baṉara ni sari tie si ṉoṉovala.

¹⁶Na baṉara sapu ṉoṉovala si loke nana ginilagilana, ba asa pu kilui sari tinago hinikodi si kote toa va seunae.

¹⁷Asa pu va mate tie si ta sigiti nia sa sinea pa nana binalabala meke kote koa gua lamo asa osolae mate; mani loke tie la toka nia.

¹⁸Asa pu ene pa tinoṉoto si kote ta kopue, ba asa pu lopu leana sa nana hahanana si kote lopu sana hoqa.

¹⁹Asa pu tavetavete nia sa nana pepeso si kote soku gana ginani, ba asa pu koa va gulegulea si kote kamo habahuala.

²⁰Sa tie raṉeraṉena si kote soku nia minana, ba asa pu hiva tuturei tagotago si kote kamoa tinasuna.

²¹Pude va kalekale pa totoso varipitui si lopu leana, ba pa vasi bereti mo si boka tavete va sea sa tie.