Muqâqiŋ Dâŋ 27:1-23

¹Go tomâckore manasuhuc sahac fefe mi ezemec. Tomâcko wiac iŋuc me iŋuc fuaocmu i go mi manaekic.

²Go gahac sahacge mi mumbiaŋkezemec, ŋic gâcne jaŋe mumbiaŋgupie sâckeocmu.

³Qânâ i wiac ŋemâcne â moŋgeŋ i wâc wiac ŋemâcne jaha, erâ sifu ŋic mutucne moczi maŋbâiŋ enâreocmu i jahere sâc sirickerâ mocwâc ŋemâcne jâmbâŋ eocmu.

⁴Aaric i wiac gâgâpâcne â sisipiric‐ticnehec, mamanauŋzi ine irec sâc jâururâ mocwâc mamakâcne jâmbâŋ ekac.

⁵Hofao mu bâtiŋ ee izi wiac biaŋne, â maŋjauŋ aputacne izi ine wiac fâri tâmiric.

⁶Âgogezi bâʒâicgume manatec mi sâqorezejec, â râsigezi hâpo qâqâic egareme ine rucge bazemec.

⁷Ŋic moc e nânâ wiac gâcne nâ gapec erâ baŋacte maname aŋacmâc eocmu, â moc e ine nânâre hâmo sâqorehuc wiac hâtânere wâc maname aŋacne eha nâocmu.

⁸Ŋic moc e fic hae‐ticne beherâ kosa juocmu e wipe jaŋe sareŋ‐jeŋic beherâ sawao rac warec ehuc jueŋgopieŋ irec sâc eocmu.

⁹Wokemaŋ âsu â huc âsu izi bubiaŋ bâfua‐nâreekac, â wiac ʒârâ hâriŋneheczi ine busâqoc bâfua‐nâreekac.

¹⁰Go gahacne âgofâc me mamacgere âgofâc jaŋere mi nikecguzejec. Go ʒârâ hâriŋ faio juhuc hahac ɋafâcge jaŋe baficguniŋte mi numu‐jarezemec; jaŋe ʒoricko juhapie âgoge moczi bembeŋko juhuc baficgume biaŋkeocmu.

¹¹O motec‐mae, go maŋɋârâŋhec jutec bunane biaŋkezejec, ehame nore dâŋ mueŋgopieŋ jaŋe okacne sâcne bâtikie‐jarepemu.

¹²Ŋic maŋɋârâŋhec jaŋe sisipiriczi maic‐jopame hone tarahuc kizueŋgopieŋ; â ŋic maŋɋârâŋ tâmiric jaŋe ine hone‐bipiehuc rarâ sipirickeeŋgopieŋ.

¹³Ŋic moczi mutuc erâ ŋic âgo‐ticnere tofa bazuocte mupaŋkeocmuo ine ŋaqi qoruc wiac‐ticne hotâ jâoc rorâ râepene foha mumupaŋ‐ticnere fârine bâfuazejec.

¹⁴Go furi uupicte hahaŋne bahuc âgoge wiracnerâ furi biaŋ âzâcnetec maname sâwecnukac tinac eocmu.

¹⁵Ŋokac râŋgeŋnere dâŋ i hoe micpiic furicte erâ hehuc domaha hae ŋafeekac irec sâc ehuc tatakic bâfua‐nâreekac.

¹⁶Manakic, ŋic moc e mâŋâŋ bâniniŋkeocmu me mefâre‐ticnezi wokemaŋ opâne basanaŋkeocmu e ŋokac iŋucnere dâŋ wâc sâcne bâniniŋkeocmu.

¹⁷Wiac aeŋzi bakicne i aeŋzia ʒâmueŋgopeneŋ irec sâc jaha nâŋâc ŋic âgofâc‐nâŋec jaŋeraonec mamana roeŋgopeneŋ.

¹⁸Ŋic moc e nemuja jâc hone soŋaŋ ecneocmuzi fârine fuame sâcne nâocmu, â kiŋaŋ qaqa moc e bomboŋ‐ticne hone bafic ecneocmu e irec furine roocmu.

¹⁹Nâŋâc opâo fipene hume mumuc‐nâŋec jaha honeeŋgopeneŋ, iŋuc jaha maŋnâŋecko fipene hume fuŋne‐nâŋec hone taraeŋgopeneŋ.

²⁰Hâmoc haezi ŋic ʒuʒuhuc jaha rocjopaocte ecneekac, irec sâc jaha ŋic ʒâŋe‐nâŋeczi wiac ʒâŋe furu honeocte boc ecneekac.

²¹Siliwa â gol i ʒocko rike esâic eeŋgopeneŋ, ŋicte fuŋne ine ʒâŋe biŋe‐ticnezi bataniŋkeekac.

²²Go ŋic mutuc matacne qâhâmozo qatecne mutuc‐ticnezi sifu mi omaeocmu.

²³Ŋicne ŋicne nâŋâc juju sanaŋ mi jueŋgopeneŋ, iŋuc jaha mafa mâriri i wâc fofo sanaŋ mi foekac, irec go lama bulimakaofâcge hone soŋaŋ biaŋne ejarezemec.