Muqâqiŋ Dâŋ 23:7-34

⁷E nânâ garehuc ŋifec ine upegao baocmu. Ehuc maŋticnezi gorao mi domaha miczi burec erâ ʒiŋuc gazahuc eatucguocmu: “Ware nânâ opâ nâc.”

⁸Go ere nânâ wiac nârâ maŋucmu, ehuc daŋgedâŋ âzâcnetec fârimâc eocmu.

⁹Go ŋic mutuc matacne ere maio dâŋ mi muzemec, e maŋɋârâŋ dâŋge mi mana tarahuc qaisockeocmu.

¹⁰Apa ŋosafâcge jaŋe mâreŋ ma râembiŋ i baʒic baefuc mi ezemec, erâ bekâ mâsiŋ jaŋere mâreŋ wâc mi jowac rozemec.

¹¹Wofuŋ e jaŋere ŋeŋezic hâcne, irec dâŋgieo jaŋere dâŋ dopeckehuc gore dâŋ bawahaocmu.

¹²Go qaqazugere dâŋte hazec râehuc tâpiri fogarekac sâc mamana gie bazemec.

¹³Go naru motec bâtiŋ‐jopazore manabâc mi ezemec, jaŋe kâcbiŋ kirâ mi hâmoniŋmu,

¹⁴aricne, kâcbiŋ kirâ juju bapa‐jeŋic biaŋkeocmu.

¹⁵O motec‐mae, go maŋɋârâŋhec erâ jucmuo ine bunane biaŋkeocmu.

¹⁶Micbipicgaonec maŋɋârâŋ dâŋ wahame manarâ ʒeri bari epemu.

¹⁷Go sâqocne bapa jaŋere erâ maŋge mi bâruŋkezejec, Wofuŋ ine dameŋ sâc araŋ bacnehuc juzemec.

¹⁸Go iŋuc ehuc juhaŋte woworicgezi mi omaeocmu.

¹⁹O motec‐mae, no gazape manac: Go maŋɋârâŋhec juzemec, ehuc hata fâretiŋko jaha maŋ mamanasuge râetec fozejec.

²⁰Go ŋic waiŋ âmbâŋ nânâ me nânâ gapecmâc nâeŋgopieŋ jaŋere ŋondeŋko boc mi juzemec.

²¹Opâ sanaŋ â bec qowi âmbâŋ nânâ ŋic i jaŋe hapetac erâ juniŋmu, ehuc ojoŋ fohuc ŋaqi qoruc basaniŋmu.

²²Go mamac bâbâfuage ere dâŋ manahuc juzemec, â neŋgocgezi ŋokac qizec erâ juha mi qaisockezemec.

²³Go dâŋ fâri qizecne, maŋɋârâŋ, maŋsowa juju â mamana tara i furine barâ bajuhuc moneŋte erâ mocwâc mi qikiŋnezemec.

²⁴Ŋic tiŋnere mamaczi ʒeri eocmu, â ŋic moc e motec‐ticnezi maŋɋârâŋhec jume bubiaŋ manaocmu.

²⁵Go juju bapagezi neŋgoc mamac jahecge bubiaŋ qajactezemec, ehame neŋgoc rorogezi gore erâ ʒeri bari ezejec.

²⁶O motec‐mae, go maŋge norao râetec fooc, ehame kike hata‐nane honehuc juzemec.

²⁷Hata ŋokac iriŋ biriŋne â sasec ŋokac jaŋe bitiŋ egarehapie raʒitec kihâmocguocmu:

²⁸Ŋokac i jaŋe hâcne fiuc roro ŋic jaŋe iŋucne ruc bahuc jueŋgopieŋ, ehuc ŋic bocjaha eatuc‐jopapie ŋonâŋfâc‐jeŋic behec‐jopaeŋgopieŋ.

²⁹Mozi ʒârâ ʒâpâo â busâqoc faio juekac, me mozi mu qaqatarac â muheŋɋâŋhec juekac, me mozi fuŋne tâmiricko wic fuacneekac, me mozi ʒâŋe bâruŋhec juekac?

³⁰Waiŋ opâ nâhuc ŋehapie ŋafe ʒâŋiŋkeekac, erâ waiŋ opâ fuŋne fuŋne bâsifuckerâ nâeŋgopieŋ ŋic i jaŋe hâcne wiac i fua‐jareekac.

³¹Go waiŋ opâ bâbâroŋ â ɋaɋac taeŋne i opâ nânâ kiruŋko du âtehuc wefume hone aŋac erâ sifu âmbâŋ mi nâzemec.

³²Manakic, go waiŋ opâ gapecmâc nâku guŋ fohaŋtec hae fureme manatec homa momorizi kicnume huc fua‐nareekac irec sâc egareocmu.

³³Ehame ʒâŋege bâniniŋkeme wiac ʒâŋe furu honecmu, erâ mamanasuge sifuckeha dâŋ musifuckecmu.

³⁴Go ŋic moczi wokeo rahuc maŋuekac, â hâwec siri sâko qaha jâmâ wâtuŋko wiserâ feekac irec sâc ecmu.