Ol Provep 23:7-34

⁷Go piaene aa raapu eta nali-dare mo aame ne gupa lagialia. Eta ipa oyae luabu apo ia-ga nena raana palia-rupa aipapulu nabape tea. Goa tea pare ora agaa-da nata ne eta nali-rupare aba gupa nalialo nipuna kone-para makuaaya.

⁸Goa pua neme eta no kiritua aana pea luabu ado kirituare mo mea nalide eta luabu wala maaku ratu rubali-ga mo tede omeme pi agaa page puri napaloa ini namadialia.

⁹Aa meda kone epe-rupa nasalia raapu neme agaa nalape. Neme epe agaa nipu lakete-dare go agaa pa sa so lalia.

¹⁰Ora abade su robo isimidere neme wala yolamonea meda nasape. Neme agi aaraanu aba ome onaana su page nameape.

¹¹Adaa Aa-re amame padane-para madini nona pi aaya-pulu mo nogo naakinu rabamealia. Goa pua nipumi puri adaa mua raba mulalo puri waru paloa koso madaa page rabamulalo pea.

¹²Gore ne agaa mana lagialoga go agaa mana waru pagoa makuape. Nena aane waru luyapa-ina pagoa go agaa waru makuaaliri epe yae rayo waru makuaali.

¹³Neme nogo naaki tua kuma mapape madaare paalame naomape. Neme agaa mana loa tali-daare nipu na-omalia.

¹⁴Dia neme goa pali raburi maredepo yali-daa nipu ome onaana su-para mada napalia.

¹⁵Naakinumi epe kone-para epe makuae yae mealimi rabu nena pu robaa-para page ora epealia.

¹⁶Neme nena epe redepone agaa pagape madaare raana ora waru pea.

¹⁷Neme waea peme aanuna pemea adoa epame na-omape. Oro yalo neme Adaa Aa madaa raana omo pirua kone sape.

¹⁸Neme go pora ratu pirali-dare nena orope pirape yaere ora epeaalia. Goa puare ne page ora aipapulu mada na-omali.

¹⁹Naa naakimi naa agaa pagoa epe kone mea. Goa puare nena pora pamuali-rupa pawa adoa pamuape.

²⁰Nere ipa waini-para eta ora adaapu neme aanu raapu padane-para napamuape.

²¹Ipa bia-para eta adaapu neme aanu nimu ora naraa piralimi. Go yapare aa medalomame pa ipa agu noa u-patu piraliare nimu mamina riripipape pi yamoa piralimi.

²²Nena aapame ne maopasa-ga nipuna agaa waru pagape. Nena aama page ogae yalia rabu ne ora waru yae-da kalape.

²³Neme ora waru puri paloa epe kone-para epe kogono pape-para epe makuae yae meape madaa puri paloa kogono pape. Neme go epe kone narubape.

²⁴Gore aa medame epe kone sua epe pora ratalia-daare nipuna aaraame go naaki madaa raaname ora waru omea.

²⁵Neme go agaa pagoa epe pora luabu ratali raburi nena aama-aapame ne ora epe ta loa adaa raaname omoa pedo pedo waru palipi.

²⁶Go naaki neme nina kone ora waru adoa naa agaa pago pirali-daare epe yae luabu adaina.

²⁷Wae paake aa rume onare ipa naaku meda-rupa yapulu go-para lopoladere pua omaalimi.

²⁸Go piaene onanuri paake ne aanumi pemede-rupa surubaeme-ga waru adalepape. Nimumi aa adaapu rumeme rabu aaninumi gimeme.

²⁹Aa apimi kedaa naloa nipuna bipa odo omea pae? Aa apimi agaa adaapu loa yada marekaaya pae? Aa apina to madaa rere pia pae? Gore apina inipara ora ka-nea loa ayapae?

³⁰Go aanu luaburi oro yalo ipa bia-para wain lapo noa maeyae aanu yade.

³¹Mo wain nipu epe pepena pua ranapi yae saliare nena kone-para ora mea gi tea gimape. Nena peto-para page mea nali rabu rede-ora waru palia.

³²Wala ekeraa ribareko raburi paaka wae medame onaa nalade-rupa mada palia.

³³Gore nena kone luabu ora oyalia rabu neme oyae rado meda ade nona palia. Neme goa pua makirae agaa adaapu te.

³⁴Goa pua ne pate raburi ipa sipi mo solowara mada pulaina so sipina ini kadu madaa piri nona palia.