Muqâqiŋ Dâŋ 14:9-35

⁹Ŋic mutuc matacne jaŋe manabâc mi ehuc sâqocne bâfuaeŋgopieŋ, â ŋic biaŋne jaŋe ine sâqocne‐jeŋic tâmireocte ejareekac.

¹⁰Maŋnâŋecko bubiaŋ me busâqoc fuaekac i ŋic moczi honerâ babafic‐nâpone mi eekac.

¹¹Ŋic sindaŋnere ficzi tâtiehame ŋic tiŋnere fic i sanaŋkerâ ŋeocmu.

¹²Ŋic nâŋâc hata moc honerâ biaŋne muhapene sifu hata izi raku hâmoc haeo mecne fisikac.

¹³Ŋic moc e busâqocko juipiehuc sifu mu gâgâwizi busâqoc‐ticne tapa baocmu. Dameŋ gâcnao bubiaŋ tarame busâqoc fuaekac.

¹⁴Ŋic sâqocne moc e eebapa‐ticnere sâcko okacne roocmu, â ŋic biaŋne moc e wâc iŋuc jaha eebapa‐ticnere sâcko furine roocmu.

¹⁵Ŋic mutuc matacnezi dâŋ sasawa irec maname fârine eekac, â ŋic mamanaheczi ine hata‐ticne hone tarahuc raekac.

¹⁶Ŋic mamanaheczi bahac wiac bâfuazacte aimuŋ jaha juekac, â ŋic mutuc matacnezi ine maŋne bâruŋkeme wiac manabâc tâmiric eekac.

¹⁷Ŋic maŋʒoc‐ticneheczi wiac mutucne eekac, â ŋic maŋuruchec eki ine wama ruaine juekac.

¹⁸Ŋic mamana tâmiric jaŋe mutuc‐jeŋicte fârine mutuc jaha roeŋgopieŋ, â ŋic mamana saric jaŋe ine mamana tara ro rauc eeŋgopieŋ.

¹⁹Ŋic sâqocne jaŋe ŋic biaŋne jaŋere maio dapenʒepieŋ, â ŋic sindaŋne jaŋe ŋic tiŋne jaŋere motâcko rumerâ domanʒepieŋ.

²⁰Ŋic hapetac jaŋere takic‐nâpome âgo boc mi ejareeŋgopeneŋ, â ŋic moneŋ mafa sâkohec jaŋere ine boc aŋac‐nâpome âgo bacjopaeŋgopeneŋ.

²¹Ŋic moc e ŋic âgofâc‐ticne qaisoc‐jopaocmuzi kiŋ hureocmu, â moc e ŋic hapetac ehâmo‐jareocmuzi ine ʒeri bubiaŋ bâfuaocmu.

²²Wiac sâqocne manasu biric eeŋgopieŋ jaŋe hehesic bâfuaeŋgopieŋ, â wiac biaŋnere gie baeŋgopieŋ jaŋe ine ŋic âgofâc‐jeŋic jaŋe mana‐jarepie fefene eha jaŋerao roweckeeŋgopieŋ.

²³Go gie ʒoɋachec bahuc jujugere ŋesiŋ sâcne bâfuacmu, ojoŋ juhuc dâŋgie sawa bahuc jucmuo ine ŋesiŋ basarâ ŋesawa ecmu.

²⁴Maŋɋârâŋhec juju izi ŋic mamana saric jaŋere eri hendiŋ ekac, â mutuczi ine ŋic mamana tâmiric jaŋere qâ ʒere ekac.

²⁵Ŋic moc e dâŋgieo dâŋ fâri qizecne mutaniŋkeocmuzi ŋic âgofâc‐ticne jaŋere juju ŋezickeocmu, â moc e ine burecdâŋ muocmuzi ŋic âgofâc‐ticne doc bacjopaocmu.

²⁶Ŋic moc e Wofuŋ araŋ bacneocmuzi erao rowecke sanaŋkeocmu, e iŋuc ehuc naru motecfâc‐ticne jaŋere qânâuŋ eocmu.

²⁷Wofuŋ araŋ babacne izi jujure opâ ʒâŋe ekac, moc e opâ i nâhuc hâmoc getâckeocmu.

²⁸Ŋicwofuŋ moc e kikefuŋfâc‐ticne guru sâko jucnepie ʒâŋe biŋe sâkohec eocmu, â kikefuŋfâc‐ticne jaŋe tâmiric ine ŋic omane tinac eocmu.

²⁹Ŋic moc e buuruchec juocmuzi mamana‐ticnere fuŋne bataniŋkeocmu, â moc e maŋʒoc‐ticnehec juocmuzi ine mutuc‐ticnere fuŋne bataniŋkeocmu.

³⁰Ŋic moc e wama ruaine juhuc sahac‐ticne gume jowac eocmu, â moc e maŋʒârâ‐ticnehec juocmuzi ine siec bibiricko wicsanaŋ fuaekac irec sâc eocmu.

³¹Ŋic moc e hapetac jaŋe bâʒâic‐jopahuc bâbâfua‐ticne wâwânâŋ ecneocmu, â moc e qarâ suriŋne jaŋe ehâmo‐jarehuc bâbâfua‐ticne araŋ bacneocmu.

³²Ŋic sindaŋne e eebapa‐ticnezi bawahaekac, â ŋic biaŋne e ine siocmâc juju‐ticnezi ŋeŋezic‐ticne eekac.

³³Maŋɋârâŋzi ŋic mamanahec jaŋere maŋko ŋeŋe juju eekac, â ŋic mutuc matacne jaŋere maŋko ine maŋɋârâŋ basaeŋgopeneŋ.

³⁴Tiŋe jujuzi ŋic ʒâŋe biŋe‐jeŋic bafahareekac, â eebapa sâqocnezi ine mimi busâqoc bâfua‐jareekac.

³⁵Ŋicwofuŋ jaŋe kiŋaŋŋicfâc‐jeŋic maŋɋârâŋhec jaŋere manapie biaŋkeekac, â maizi qambaraŋ ejareeŋgopieŋ jaŋe ine bâtiŋ‐jopaeŋgopieŋ.