Mumutara Ŋic 1:1-34

¹Josua hâmome faicnao Israe ŋic jaŋe Wofuŋ wiocnerâ mumbiŋ: “Kanaaŋ ŋic jopazore guru wenimoizi micne banârehuc feocmu?”

²Eme Wofuŋzi muwec: “Manaŋgopieŋ, no mâreŋ i Judare meo râepore eki fezejec.”

³Eme Juda guru jaŋe qomâfâc‐jeŋic Simeoŋte guru jazarâ mumbiŋ: “Nâŋere mâreŋko mâmâc fehuc Kanaaŋ ŋic jopanʒepeneŋ. Ehame nâŋe wâc iŋuc jaha ŋoŋere mâreŋko mâmâc ranaŋmu.” Eme Simeoŋte guru jaŋe bâjâpec‐jopapie rambiŋ.

⁴Eme Juda guru jaŋe ʒikao rahapie Wofuŋzi Kanaaŋ â Periʒi ŋic mejeŋicko râec‐jopawec. Eme jaŋe ŋic 10 tauseŋ Beʒeki hae mendâŋko jopambiŋ.

⁵Eme Beʒeki haeo Adoni‐Beʒec erao fisirâ ʒika qambiŋ. Ehuc Kanaaŋ â Periʒi ŋic bawahac‐jopambiŋ.

⁶Â Adoni‐Beʒec e ine wisehame jâpe ra rorâ meneŋgoc jahecne â kike neŋgoc jahecne hetâcnembiŋ.

⁷Eme Adoni‐Beʒeczi muwec: “Ŋicwofuŋ 70 meneŋgoc â kike neŋgoc‐jeŋic hetâcnekicnezi nore tebo rurumaŋko nânâ huŋgaŋ nuse nâc ejumbieŋ. No iŋuc epore Anutuzi okacne bazu‐narekac.” Eme jaŋe Jerusalem haeo barapie ira hâmowec.

⁸Eme Judaŋic jaŋe Jerusalem haeo ʒika qambiŋ. Ehuc hae i ʒikazi imackehuc ʒoc turuŋkepie ʒawec.

⁹Eme ʒâhec Judaŋic jaŋe Kanaaŋ ŋic tiki mâreŋko, Negebe mâreŋ â wâneŋko jumbiŋ jaŋe jopaniŋte rambiŋ.

¹⁰Eme Juda guru jaŋe Heboroŋ haeo Kanaaŋ ŋic jumbiŋ jaŋe jopaniŋte rambiŋ. (Heboroŋte ʒâŋe mârâc Arabare hae mujumbieŋ.) Ehuc micnefâc‐jeŋic Sesai, Ahimaŋ â Talamai iŋuc jopambiŋ.

¹¹Eme irecnec ine Debiri haere ŋecjucfâc râsi fisi‐jareniŋte rambiŋ. Debiri haere ʒâŋe ine mârâc jaha Kiriati‐Sefe iŋuc fowec.

¹²Eme Kalebezi muwec: “Moc e Kiriati‐Sefe hae imackerâ rome otâ‐nane Akisa râcnepe ŋonâŋ‐ticne eocmu.”

¹³Mume Kalebe ɋaticne Kenaʒire ŋokâ Otiniezi hae i rowec. Eme Kalebezi otâ‐ticne Akisa râcnewec.

¹⁴Eme ŋokac e fisime ŋowe‐ticnezi hesarac mâreŋte mamac‐ticne wiocneocte ʒoɋac ecnewec. Eme doŋgionec wahame Kalebezi wiocnerâ muwec: “Wemo wiacte egarekac?”

¹⁵Wiocneme âzâcnerâ muwec: “Negebe mâreŋko râecnumeŋ irec wiac moc tahacnuc, ehuc opâ ʒâŋe hâcne narec.” Eme Kalebezi opâ ʒâŋe faic â juwic i mâmâc râcnewec.

¹⁶Eme Mosere kimo Keniŋic ere ɋâricfâc jaŋe Judaŋic jaŋehec hâmu gie hae irecnec Juda mâreŋ burocne Negebe mâreŋko Arada hae heririŋnao fokac ira ferambiŋ. Ehuc jaŋehec jusanaŋkembiŋ.

¹⁷Eme Judare guru jaŋe qomâfâc‐jeŋic, Simeoŋte guru hâcne, jaŋehec rarâ Kanaaŋ ŋic Zefata haeo jumbiŋ jaŋe joparâ hae i bâsirowe‐fârembiŋ. Ehuc hae irec ʒâŋe Horima mumbiŋ.

¹⁸Judare guru jaŋe hae mâreŋ ʒiŋuc rombiŋ wâc: Gaza, Asikaloŋ â Ekoroŋ.

¹⁹Wofuŋ e Juda guru jaŋehec juhame tiki mâreŋ rombiŋ. Â wâneŋko jaŋe ine ʒikare keretac aeŋzi bakicne fojarewecte jopa jâpec sâcne mi ejarembiŋ.

²⁰Eme Heboroŋ hae i Mosezi muwec irec sâcko Kalebe râcnembiŋ. Eme eki Anakare ŋokâfâc jahec â moc hae irecnec jopa jâpec ejarewec.

²¹Â Benjamiŋ guru jaŋe ine Jebusi ŋic Jerusalem haeo jumbiŋ i jopa jâpec mi ejarembiŋ. Irec Jebusi ŋic jaŋe Benjamiŋ ŋic jaŋehec jumbiŋzi juŋgopieŋ jaha.

²²Josefere kikefuŋ jaŋe iŋuc jaha Bete hae râsi fisicneniŋte fembiŋ. Wofuŋzi ine jaŋehec juwec.

²³Eme Josefere kikefuŋ jaŋe ruc bapa ŋic Bete hae hone tâcneniŋte sorec‐jopambiŋ. (Mârâcko hae irec ʒâŋe Lusi mujumbieŋ.)

²⁴Eme ruc bapa ŋic jaŋe ŋic moc haeonec wahame honerâ âzâcne mumbiŋ: “Haemaŋko raraʒire hata nâwotuc. Eme nâŋe akicguhuc wiac biaŋne egarenaŋmu.”

²⁵Eme haemaŋko raraʒire hata jowatume raʒirâ hae i ʒikazi imackehuc ŋic e jahacne â garikiŋfâcne ine akic‐jopa‐fârembiŋ.

²⁶Eme ŋic e Hitiŋic jaŋere mâreŋko rarâ hae moc bawec. Ehuc hae irec ʒâŋe Lusi muwec. Eme ʒâŋe izi dameŋ ʒiŋuczia fokac jaha.

²⁷Manase guru jaŋe hae kecʒiŋuc jaŋere ŋecjucfâc jopa jâpec mi ejarembiŋ: Bete‐Seaŋ â hae piticfâc‐ticne, Tanaki â hae piticfâc‐ticne, Doro â hae piticfâc‐ticne, Ibeleam â hae piticfâc‐ticne erâ Megido â hae piticfâc‐ticne. Irec Kanaaŋ ŋic jaŋe mâreŋ ira ʒuhuckerâ jumbiŋ.

²⁸Israe ŋic jaŋe fua sawec ehuc tâpirihec erâ Kanaaŋ ŋic jopa jâpec mi ejarehuc jaŋacne mic sâcko juniŋte mujarembiŋ.

²⁹Eme Eferaim guru jaŋe Kanaaŋ ŋic Geʒera haeo jumbiŋ i jopa jâpec mi ejarembiŋ. Irec Kanaaŋ ŋic jaŋe Geʒera haeo ŋondeŋ‐jeŋicko jumbiŋ wâc.

³⁰Sebuloŋ guru jaŋe hae kecʒiŋuc jaŋere ŋecjucfâc jopa jâpec mi ejarembiŋ: Kitoroŋ â Nahalolo. Eme Kanaaŋ ŋic jaŋe jaŋere kiŋaŋ qahuc micdâŋ‐jeŋicte sâcko jumbiŋ.

³¹Ase guru jaŋe hae kecʒiŋuc jaŋere ŋecjucfâc jopa jâpec mi ejarembiŋ: Ako, Sidoŋ, Ahalaba, Akaʒibi, Heleba, Afiki â Rehobo.

³²Ase guru jaŋe Kanaaŋ mâreŋ rune jopa jâpec mi ejarehuc jaŋere ŋondeŋko jumbiŋ.

³³Naftali guru jaŋe Bete‐Semesi hae â Bete‐Anata hae jahere ŋecjucfâc jopa jâpec mi ejarehuc Kanaaŋ mâreŋ rune jaŋere ŋondeŋko jumbiŋ. Erâ ine sifu Bete‐Semesi â Bete‐Anata haere ŋecjucfâc jaŋe Naftali guru jaŋere rurumaŋko juhuc micdâŋ‐jeŋicte sâcko gie bambiŋ.

³⁴Amori ŋic jaŋe ine Daŋ guru kikeo kikeo ejarehuc jâpec‐jopapie tiki mâreŋko ferâ jumbiŋ. Jaŋe wâneŋko wahaniŋte moc mi mana‐jarembiŋ.